Ym dei ba ïashah ne kyrshan sorkar hynrei ngin ïakren halor ki jingshisha bad kata ka long ba kane ka sorkar MDA wat hapdeng ki jingshah kynnoh ba laiphewjait laiphew rukom khamtam kata ka jingkynnoh bamsap kaba ym don pat ba lah ban pynshisha ne ujor sha ki bor ka aiñ hangno kata ka jingbamsap jong ka sorkar, ka dei pat ka sorkar kaba trei da ki kam bad lah ban ong ym pat don sorkar kaba trei kum kane lada ïanujor naduh mynshwa haduh mynta.
Lada phai dang shen sha ka jingjia jong ka jingshah pyniap jonguwei u nongwan jngohkai sha ka jylla ha la ka jong ka kurim bad ki briew kiba ka thong pisa, kiba bun ki briew kim tip hynrei ma ngi kiba tip ka long naduh u Myntri Rangbah haduh ki Symbud Myntri Rangbah bad kiwei kiwei ki myntri sorkar, ki Heh Pulit, ki Ophisar sorkar ki la duh thiah duh dem da shisha katba ym pat ïoh kem ïa ki briew kiba donkti. Ka jingduh thiah duh dem ka long khamtam ka jingshah kynnoh ba lai phewjait ha ki briew kiba nabar ka jylla, ha kiba haïing hasem jonguba shah pyniap bad wat ka nongpyniap ruh, ha ki lad pathai khubor na rithor bad ha kiba bun kiwei ruh ba kine kiba shah pyniap ki shah pyniap ha ki briew kiba napoh ka jylla.
Hynrei da ka jingtrei shitom ba jar jar jong ki bor pulit ka jylla hapoh ka jingïalam jong ka DGP bad u SP ka East Khasi Hills lem bad kiwei kiwei ki Pulit Ophisar kiba la ïatrei lang ban lap dien ïa kane ka kam bad khamtam ka kynhun SIT la ïoh kem ïa ka kurim jonguba shah pyniap bad sawngut kiwei kiba ïadon kti lang kiba dei na Madhya Pradesh bad Utter Pradesh hi. Kane ka la rah biang ïa ka nam ka burom ka jylla namar plak kumba duk da u namsarang phai ka jingjah burom hakhmat ka ri ïa kito kiba la shu kynnoh pynjah burom ïa ka jylla khlem pat da tip lut ïa ki jingshisha shaphang kane ka jingjia. Kane ka la pynkmen biang ïa ki bor synshar bad wat ïa ki paid nongshong shnong ka jylla khamtam ïaki briew kiba na ka thaiñ Sohra.
Kaba i tynnad ka long ba haba don kano kano ka saw ka sian ha ka jylla u Myntri Rangbah, ki Symbud Myntri Rangbah bad ki Myntri Sorkar ki ïatrei lang bad ki Bor Pulit bad ai mynsiem ruh ïa ki. Kane ka la ai mynsiem ïa ki bor pulit ban trei shitom miet la bad sngi tad haduh ban da lap ïa kiba donkti. Ka la pynkyndit wat ïa ki pulit jongka Madhya Pradesh haba ka DGP ka pyntip ba kin wan ki pulit ka Meghalaya sha katei ka jylla namar kumno tang hapoh 7 sngi ki la lap ïa kiba donkti.
Ym tang halor kane hynrei la ïohi ba kane ka sorkar ka la lah ruh ban wanrah ïa shibun bah ki jingkylla. Lada phai sha ki surok ki lynti ki syngkieng, kiba bun hi ki jaka ki la ïoh ïa ki surok kiba bha. Lada phai sha ka pule puthi ka sorkar ka ïaleh katba lah ban pynbha ïaki skul sha ki thaiñ nongkyndong ba kin ïa ryngkat kyrdan kum ki skul hangne ha sor. Lada phai sha ka koit ka khiah ka sorkar halor kane ruh ka shim khia bha ym tang ba ka peit tang ïa ki hospital ne jaka sumar jongka sorkar hynrei khamtam ka jingïarap ïa ki hospital kiba la rim kiba don ha ka jylla mar arklur tyngka. Kane ka la ïarap bha ïa ki ba kin ïoh thied ïaki tiar ai jingsumar kiba biang kat kum kane ka juk ba mynta. Nalor kata lada phai sha ka rep ka riang ruh ka sorkar ka shim khia bha ban ïarap ïaki paid nongrep ha kiba bun ki liang. Na ka bynta kito kiba seng kam seng jam lajong ruh ka sorkar ka pynshlur bha ïa ki da kaba ai jingïarap ïa ki kum ka subsidy bad grant.
Lada phai sha ka New Shillong Township ruh la ïohi ba dang mynta khyndiat snem ba la don ka jingkylla bad la don ka jingkhmih lynti ban ïohi shisha ïa kata ka New Shillong hapoh ki khyndiat snem ban wan namar ïa ki ophis sorkar la tei lut sha katei ka jaka, ïa ka Secretariat ruh la sdang ban tei, ïa ka Assembly ruh la jan dep bad bun kiwei kiwei kiba ym lah ban ñiew tang kiba kane ka sorkar ka la leh. Kumta haba ka sorkar ka trei ki paidbah ruh ki dei ban ïa ai mynsiem ym ban shu kynnoh khlem ki sakhi sabut ne ki nongrim kiba biang. Hynrei lada lap ba ka sorkar ka leh bakla ryngkat ki sabut satar kiba biang dei ban jyrwait shkor beit da kaba ujor sha kibor ka aiñ ba kin leh ïa kaba donkam kat kum ka aiñ.
