Shillong, Jylliew 19 : U MLA ka NPP na Phulbari u SG Estamur Mominin u la ong ba ka sorkar Meghalaya Democratic Alliance (MDA) ka dei ka sorkar kaba lait na ka bamsap.
Utei u MLA u la ong ruh ba la thung ruh ki jingtohkit halor ki jingkynnoh bamsap kiba mih pyrshah ïa ka sorkar MDA bad ruh ïa ki myntri sorkar.
“Ki jingtohkit ki lap ba ym don ei ei kaba mut ba ki Myntri sorkar kim donkti bamsap bad ba ka sorkar ka lait na ka bamsap,” u la ong.
Katei ka jingkren jong u kadei halor ka jingtohkit ba la thung da ka sorkar halor ki jingkynnoh bamsap ha ka tnad Meghalaya Energy Corporation Limited (MeECL), ka jyrsieh khaw bad kiwei kiwei.
Da kaba ïaroh ïa ka jingtreikam jong ka sorkar MDA ha ki saw snem shiteng hapoh ka jingïalam jong ka NPP, u Mominin u la ong ruh ba ym .don jingartatien ba ka sorkar MDA kan bteng biang sa san snem.
“Nga ïohi ïa ka sur ki paidbah ba kin sa pynjop biang ïa ka NPP,” u la ong da kaba bynrap ba ka party ka skhem ban jop 32 seat ha ka elekshon ban long ha u 2023.
Nalorkata u ong ruh ba ka sorkar ka la leh shibun bha na ka bynta ban shna bun ki lynti syngkien.
“Ki kam pynroi naduh ki surok, ki jingkieng bad kiwei ki kam pynroi kynthup naduh ki skul ngi la pyrshang lut ha kine ki saw snem tam. ka don beit ka jingïakhun ha constituency jongnga, ngam ong ba kam don hynrei nga sngewskhem ba ngan jop biang,” u la ong.
