Shillong, Jylliew 23 : U National Vice President ka NPP bad Symbud Myntri Rangbah ka jylla u Bah Prestone Tynsong mynta ka sngi Thohdieng ula ong ba ka Sorkar Meghalaya Democratic Alliance-2 ka dang skhem triang bad kan pyndep ïa ka jingsynshar ha baroh kane ka samoi san snem.
“Kane ka jingïapynbeit ba mynta haba phai hi sha ka Sorkar, ngi dang ïaskhem beit triang bad ngi baroh ngi la kut jingmut, ngin pyndep ïa ka samoi u 2023 haduh u 2028. Ka (UDP) paralok ba ïajan bha, kan dang ïai bteng bad ngin ïa ïaid lang beit” ong u Bah Prestone haba ïakren bad ki nongthoh khubor.
Kane ka jingkynthoh jong u kala mih hadien ba ka NPP kala pynkhyllem noh ïa ka Executive Committee ba ïalam da ka UDP ha KHADC da ka jingkyrshan lang jong ka Congress.
U Bah Prestone ula kyntait ruh ban kynthoh eiei halor ka jingtyrwa ka Congress ïa ka jingkyrshan ïa ka Sorkar MDA ba ïalam da ka NPP khlem ka BJP bad ong “Peit ïa ka jingïapynbeit ba mynta, kane ka jingïapynbeit ha ka MDA-2 kan ïai bteng tad haduh da kut ka samoi”.
Halor ka jingkynnoh ka UDP pyrshah ïa u, u Symbud Myntri Rangbah ula ong ba kumno ka UDP ka lah ban kynnoh ïa u ha ka jingpynkyllem ïa ka EC haba ma u um dei satia wat u MDC ba shusieh jong ka Council ruh.
“Peit ngam dei wat tang u Dkhot ba shusieh jong ka District Council, kumno ka UDP kan kynnoh ïa nga ba nga dei uba pynkhyllem ïa ka EC. Sngewbha kylli na ki ba kumno u bah Prestone u lah ban pynkhyllem ïa ka EC namar ngam dei satia wat u dkhot ba shu sieh ka KHADC” ula bynrap.
Dang shen, u CEM barim ka KHADC Bah Titosstarwell Chyne ula kynnoh ba kawei na ki kyndon ba la buh da ki MLA ka People’s Democratic Front (PDF)-Bah Gavin M Mylliem (Sohra) bad Banteidor Lyngdoh (mawkynrew)-haba wan ïasoh bad ka NPP ka long ban weng noh ïa u kum u CEM namar u dei u jingma ïa ka lawei ka jong ki.
Haba kynthoh ïa kane, u Bah Prestone ula ong “Peit na ka jingsngew kutlad, kino kino ki nongïalam haba poi hi ha kum kane ka khep, teng teng ki ju kren kumne, kynnoh ïa kiwei, kaba mut ba kim pdiang ba lehse ka jingbakla ka sdang na u hi. Ka ju jia hi ïa u briew uba rem elekshon, kin ym kynnoh ba ki rem eleskhon namar ka jingbakla lajong, hynrei kin kynnoh ba ki theh pisa…..bad namar ki la leh ïa kane, leh ïa katai—kane ka dei kaba ju mih beit”.
Haba kylli la kan don ka jingpynkylla ïa u MDC ba shusieh, u Symbud Myntri Rangbah ua ong ‘Wat kylli na nga namar sa shisien, ka sien jam hi ka dei kaba hap ban shim da ka EC jong ka KHADC. Hynrei ïa mynta hi kam pat don kum kata ka jingtyrwa ba la phah sha ka Sorkar lane sha nga…ngam don eiei ban ong ïa kata”.
ïa ka kam MDC ba shusieh jong ka KHADC la bat da u Chief Adviser ka UDP Bah Bindo M Lanong, uba dei ruh u Symbud Myntri Rangbah barim ka Jylla bad kumjuh ruh u Lamphang barim ka ïingdorbar Thaw Aiñ ka Jylla.
