Ka Sorkar, ki Private Sector ruh ki pynkheiñ ïa ka Minimum Wages Act 1948: KHNAM

Shillong, Nohprah, 11: Ki nongïalam jong ka Khun Hynñiewtrep National Awakening Movment (KHNAM) u Bah Thomas Passah ha ka sngi Balang ki la aiti da ka dorkhas sha ka ophis Labour Commissioner, Shillong ban dawa ba dei ban pynkiew ïa ka Basic jong ka dor bai bylla sngi katkum ba la bthah ha ka Minimum Wages Act 1948.
Ha jingïakren bad ki lad pathai khubor u Working President jong ka KHNAM u Bah Thomas Passah u la kynnoh ruh ba bun bha kiba pynkheiñ ïa ka Minimum Wages Act 1948. “Ki tnat sorkar ruh ki pynkheiñ, ki organised sector bad ki private sector ruh ki pynkhein. Ka jingeh ka long wat haba ka Sorkar ruh ka pynkheiñ ngin dang ïakren sa kumno pat lada ki Private Sector ruh ki pynkheiñ,” u la bynrap.
“Ki nongbylla sngi, ki dei ban ïoh ïa ka jingsiew katkum ba la bthah ha ka aiñ. Ka tnat treikam jong ka Sorkar ka pynmih ïa ka jingpynbna ba la pynkiew ïa ka VDA ha u bnai Nohprah, 2024 bad ka treikam naduh ka 1 tarik, Risaw, 2024 bad ha ka jingshisha dei ban ai ruh wat ïa ka Arrear hynrei wat ka Arrear ruh kim ïoh. Kane ka pisa ka rung sha ka pla jongno?” la buh jingkylli u Working President ka KHNAM.
“Haba ngi shem ba ka ophis Labour ka pynkiew ïa ka bai bylla sngi kaba tang T.2 ha kane ka juk ba mynta kam ïahap shuh ïa ki paidbah kiba im kamai jakpoh na ka kam bylla sngi la ka long ha ki tnat treikam ka Sorkar ne ha ki Organised Sector ruh,” ong u Bah Passah.
U la ong ba la wanrah ïa ka Minimum Wages Act 1948 da kawei ka jingthmu ban ïada ïa ki nongbylla sngi ba kin ïoh ïa ka jingsiew kaba biang bad kaba lah ban im.
“Hynrei ngi lap mynta ba ka jingpynkiew ïa ka bai bylla sngi tang T.2 tyngka ka long pyrshah ïa ka jingthmu jong ka aiñ,” ong u Bah Passah.
“Ka jingpynkiew kaba mynta na ka tnat Labour ka dei ïa ka Variable Dearness Allowance (VDA) ym ïa ka Basic kaba katkum kaba long katkum ka aiñ ba la leh da ka Labour Bureau kaba long manla da ka jingthmu ba ka jingpynkiew dor kan ïahap bad ka VDA kaba ju pynkiew manla ka hynriew bnai,” la ong shuh shuh u Bah Passah bad bynrap, “hynrei ynda ngi la wan hangne ha ophis jong ka Labour ngi hap ba ka Labour Bureau kam shym la leh bha ïa ka kamram ban tip haduh katno ka jingkiewdor jong ki marbam mardih. Ngi kum ki paidbah ngi tip shai ba ka jingpynkiew dor T.2 kam ïahap shuh hangno hangno ruh.”
U la ïathuh ba ka party ka la aiti ïa ka jingthoh sha ka Labour Commissioner ba thymmai ka ban bishar bniah ïa kane ka jingdawa.
“Ngi la wan ïakynduh teng mynshwa ïa ki bor ba dei peit jong ka ophis ban ïakren halor ka jingpynkiew ïa ka Basic jong ka dor bai bylla sngi. Ngi la pynpaw ha kato ka por ba ka tnat Labour jong ka Sorkar Meghalaya ka la pynkheiñ ïa ka Minimum Wages Act 1948,” la kynthoh u Bah Passah.
Haba batai ïa ka dor ba la pynkiew ïa ka bai bylla sngi da ka tnat Labour, u Bah Passah u la ïathuh, “ha ka 1 tarik, Risaw, 2023, ïa ki Unskilled-T.402 bad ha ka 1 tarik, Ïaiong, 2024 ka poi T.417, kaba mut la pynkiew tang T.15 bad la pynkiew biang ha ka 1 tarik, Risaw, 2024 sa T. 419 kaba long tang T.2.”
“Ngi la pyni ïa kane ka jingkheiñ khnang ba kin sngewthuh bad ba ka Sorkar ruh kan phaikhmat ïa ka jingeh jong ki nongbylla sngi. Kumba ka long, kine ki jingkheiñ, ka Labour Bureau kaba dei ban leh ïa ka Consumer Index Pricing ban ai rai katno ban kyntiew hynrei kim shym la pyndep ïa ka la kamram pynban ki la shu shong tang ha ophis ban leh ha la ka jong ka mon da ka jingthmu ban ym pynlut than ïa ka pla tyngka jong ka Sorkar,” la kynnoh u Working President ka KHNAM.