Ka sorkar kan ym shah ban tih uranium, ym lah hi ruh ban tih lada ym mynjur ki trai jaka : Dy CM

Shillong, Naitung 29 : Kumba ka sorkar ka la rai naduh kaba sdang ba kan ïeng pyrshah beit ban tih ïa u mar pohkhyndew uranium ha ka jylla ha ki thaiñ Domiasiat, West Khasi Hills kumta ruh kan ïai pyrshah haduh kaba kut nalor kata sa kawei kaba kham kongsan ka long ba lada ym ïoh hi ka jingmynjur na ki trai jaka ym don ba lah ban tih ïa utei u mar poh khyndew ha kane ka jylla, ong u Symbud Myntri Rangbah bah Prestone Tynsong.
U la kren ïa kane hallor ka jingjubab u myntri ka sorkar pdeng hapoh ïing dorbar thawaiñ Parliament u Jitendra Singh uba dei peit ïa ka tnad Atomic Energy ba ka sorkar pdeng ka dang don beit ka jingthmu ban tih ïa u uranium ha kane ka jylla na thaiñ Domiasiat kat kum kata ka “Kylleng-Pyndengsohiong-Mawthabah Uranium Mining Project” Halor kane ka KSU kaba ïeng pyrshah naduh ba sdang ka la dep pynpaw shai biang ha kine ki khyndiat sngi ba da lei lei ruh kan ym ailad ban tih ïa u uranium ha ka jylla.
U Symbud Myntri Rangbah u la ong “ Mynshwa ka don ka aiñ ba ka sorkar pdeng ka lah ban tih ïa u mar poh khyndew ha kano kano ka jaka hynrei halor kane ka ïing bishar Supreme Court ka la pynduh pyndam ïa katei ka aiñ da kaba ka la pynmih hukum ba ka jinglong trai ïa ka jaka bad ïa u mar poh khyndew dei beit da ki trai jaka. Kumta lada ki trai jaka hi kim ai ka jingmynjur ym don ba lah ban tih ïa u Uranium ha kane ka jylla.
Lah ban pynkynmaw ba kham mynshwa hadien ka jingïakhih kaba jur jong ki seng bhalang ban pyrshah ïa ka jingtih uranium ha ka jylla, na ka liang ka sorkar MDA ka la shim ïa ka rai ban ym shah ban tih ïa u uranium ha ka jylla bad da kane ka juh ka nongrim ka sorkar kan ïeng beit haduh bakut namar ka jingtih ïa utei u mar pohkhyndew ka wanrah ka jingma ïa ka koit ka khiah ki paid nongshong shnong ka jylla bad khamtam ha katei ka thaiñ ba don une u mar poh khyndew.
Ka sorkar ha u Nailar 2016 ka la dep rai ruh ban ym shah shuh ïaka UCIL ba kan dang wad bniah ïa une u mar pohkhyndew ha katei ka thain Domiasiat hadien ba la mih ki jingpyrshah ba jur na ki seng bhalang.