Shillong, Jymmang 28 : U Symbud Myntri Rangbah ba dei peit ïa ka tnad Urban Affairs, Bah Sniawbhalang Dhar u la kam ba ka sorkar jylla kan ym khot ïakren shuh ïa ka Harijan Panchanyat Committee (HPC) na ka bynta ban ïa syllok kaba ïadei bad ka jingthmu pynkynriah noh ïa ki na Them Iew Mawlong.
“Em, ngin ym khot ïa ki. Ki (HPC) ki la pynpaw da kaba shai, kumta kumno ngin khot ïa kren ïa ki,” ong u Bah Sniawbha.
U pyntip ruh ba ka sorkar ka la dep ruh ban phah da ka affidavit ban pyntip ïa ka Iing Kashari shaphang ka rai jong ka HPC ban ym pdiang ïa ka jingtyrwa jong ka sorkar jylla.
Katkum ka jingong jong u, ka sorkar kan sa shong pyrkhat biang shen ban ïa kren halor kane ka ishu.
U Symbud Myntri Rangbah dang shen u la pynpaw ba kam long satia kaba lah na ka bynta ka sorkar ban pdiang ïa ka jingtyrwa jong ka HPC namar ka jingdawa jong ki ka long kaba heh.
Lah ban kdew hangne ba ka sorkar ka la wanrah da ka blueprint hadien ba ka la kyntait ïa ka jingtyrwa jong ka HPC ha u Ïaiong 2022 kaba pan 200 square meter ka jaka ban ai sha iwei pa iwei i longiing jong ki 342 tylli ki long iing hapoh European Ward nalor ka jingpynlut ban shna ïa kitei ki iing jong ki.
Ka jingthmu jong ka sorkar ka long ban pynkynriah noh ïa kitei ki longiing na Them Iew Mawlong sha ka jaka jong ka Shillong Municipal Board hynrei ïa kane ka jingtyrwa la kyntait noh da ka HPC dang shen ha ka jubab kaba ki phah sha ka sorkar jylla.
Na ka liang ka sorkar ruh ka kren shai ba kan ym kylla satia ïa ka nongrim ba ka don haba ïadei bad ka jingthmu ban pynkynriah ïa ki sha ka jaka jong ka SMB.
