Ka Sorkar kan ym ailad da lei lei ruh ban pyntriem ka HNLC ki bor pulit kin leh ïa kaba donkam : CM

Shillong, Nohprah 19 : U Myntri Rangbah ka jylla u Conrad K Sangma mynta ka sngi Thohdieng u la ong ba ka sorkar kan ym ailad bad kan ym ïai shah da lei lei ruh ba ka seng ba la shah ñiew beaiñ ka Hynniewtrep National Liberation Council (HNLC) kan leh ïa ki kam pyntriem jongka hapoh ka jylla. Halor ka jingpynbthei bom IED ha jaka buh tiar ka Dhar Kompani ha Shymplong East Jaintia Hills u la ïathuh ba ki pulit ki la leh ïa kaba donkam bad shen yn sa ïoh kem lut ïa kiba donkti.
Ka HNLC ka la kam ba ka donkti ban pynbthei bom IED ha ka jaka buh tiar ka Dhar Kompani namar ba u Symbud Myntri Rangbah ka jylla u Ma Sniawbhalang Dhar u khlem siew ïa ka pisa ba ka HNLC ka dawa na u.
Halor ka jingkylli haduh katno ngut ki riew saiñ pyrthei kiba shah dawa pisa ha ka seng HNLC, u Myntri Rangbah u la ïathuh ba um don jingtip kaba bniah halor kane hynrei halor u Symbud Myntri Rangbah u la ong mynshwa ka HNLC ka ong u siew mynta pat ka ong um siew kaba long mar khongpong.
U la pynthikna ba lada ka long kumno kumno ruh ka sorkar kan ym ailad bad ki pulit ki la lap ksai bun bha bad kin sa leh ïa kaba donkam. “ Ki pulit ki la shim khia ïa kane ka jingjia namar ki la ïoh jingtip kaba thikna ïa kiba donkti. Nga ngeit skhem ba u SP un sa ai jingtip kaba bniah tang shu lah ban pyndep ïa ka kam. Ki pulit ki la trei sted bha bad na kata ka daw ki la ïoh ruh ban kem ïa arngut kiba donkti”.
Ka HNLC hynnin ka sngi ka la ai jingthoh ba ka thmu ban pynbthei bom ha ka jaka buh tiar jong ka Dhar Company namar ba u Symbud Myntri Rangbah u ma Sniawbhalang Dhar u khlem siew ïa ka psia ba dawa ka seng na u.
Ki pulit ruh ki la pynthikna ba kine ki arngut kiba shah kem ki la phla ba ki dei ma ki kiba leit pynbthei bom ha katei ka jaka buh tiar jongka Dhar Kompani ha kaba kawei ka kali kit um ka la julor.