Shillong, Jymmang 27 : Ka sorkar kan pyntreikam ïaki aiñ khnang ban khanglad ïaki kam khaïi dewiong beaiñ ha ka jylla bad lada don kino kino kiba lap bad ai ka jingujor sha ka sorkar ka sorkar kan leh da kaba tyngeh, ong u myntri rangbah u Conrad K Sangma.
“ Lada don kino kino kiba lap ïa ki kam khaïi dewiong beaiñ bad ai jingtip mar mar sha ka sorkar ka sorkar kan phah tohkit bad lada lap kan pynsaja kat kum ka aiñ ïa kiba donkti” ong u Myntri Rangbah.
U la ong ba baroh shi katta ïa kino kino ki kam khaïi la pynbiang lut da ki kot ki sla kat kum ka jingdonkam. Halor ka jingkylli ba ka don ka jingkynnoh ba uwei u briew uba shah kem ha Assam halor ka jingkhaïi dewiong beaiñ uba kyrteng u Balwant Soni u ïadonkti bad ïajan bha bad u myntri ka tnad ka koit ka khiah u James K Sangma, u Myntri Rangbah u la ong ba ka sorkar Assam haduh mynta kam pat ai kano kano ka jingthoh sha ka sorkar Meghalaya halor kata.
“ Ki jingkynnoh kin ïai mih bad ïai jia bad ka long kaei kaei kaba ngam lah ban peiphang bad jubab kawei hadien kawei. Namar kumba nga la ong ba ka sorkar Assam ka khlem ai jingtip ei ei ruh em halor kane bad na ka liang ka sorkar jylla ka la peitngor ba kino kino kiba ïadei bad ka khaïi pateng ki kot ki sla ki dei beit ban biang” ong u Myntri Rangbah.
Halor ka jingkylli hato ka sorkar kan thung da ka jingtohkit halor kane, u Myntri Rangbah u la ong “ Halor ki jingkynnoh ban thung ïaka jingtohkit dei ban don ki jingshisha ym lah ban thung jingtohkit ha man la ki jingkynnoh kiba ym don nongrim ruh.Hynrei kumba nga la ong haphi lada don ki jingshisha ka sorkar ka hap ban bishar bad leh kat kum ka aiñ da kaba bthah ruh ïaki bor pulit bad ki bor synshar ba kin shim khia ban tohkit bad bud dien halor kita ki jingkynnoh”.
