Shillong, Kyllalyngkot 14 : U Myntri ka Koit ka Khiah u Ma Wailadmiki Shylla ula pynthikna ba ka Tura Medical College kan dei ka college ban pynïaid hi noh da ka Sorkar, haba pynsangeh ïa ka jingthmu ban pynïaid da ka Public-Private Partnership (PPP).
Haba kren sha ki nongthoh khubor ha ka sngi Balang, u Ma Wailadmiki Shylla ula ong “ïa mynta, ngi la rai ba ka Tura Medical College kan dei beit noh ka Government Medical College. Ngi la pynsangeh ïa ka jingthmu ban pynïaid da ka PPP mode”.
U Myntri ula kubur ïa ki jingeh ha ka ban thungkam ïa ki nonghikai haba pynpaw ïa ka jingduna ki doktor kiba kloi ban shim ïa ka kam hikai.
“Ka jingeh ka long bad ki nonghikai, ki doktor ki ban ai jinghikai hangtei. Kane kan dei ka jingeh kaba khraw. Khlem pep na ka liang jong ngi, ngi la tynruh ïa kane, hynrei khatduh kan shong ha ka jingdon ki nonghikai kiba ngin ïoh” ula bynrap.
Ka jingthungkam ïa ki nonghikai kala sdang mynta bad ka jingpyntrei ïa ki jingtei kala jan dep artad.
Ka rai ban pynkylla ïa ka Tura Medical College sha ka college ban pynïaid hi ka Sorkar kala mih namar ka jingjur ka jingdawa ki paidbah.
