Ka Sorkar kan pynbiang beit ïa ki jingdonkam ki District ban ïarap ïa ki shem lanot: CM

Shillong, Jylliew 17 : U Myntri Rangbah ka jylla u Conrad K Sangma mynta ka sngi ula pynlong biang ïa ka jingïalang lyngba ka Video Confrence bad ki Myntri kiba long ki Chairman jong ki Regional Committee, ki DC, SP bad ki ophisar jong ki district bapher bapher ban bishar bniah biang ïa ka jinglong jingman bad jingshah ktah hapoh kine ki 24 kynta na ka jingther u lapbah bad kiei kiba dei ban leh ban ïarap ïa ki shem lanot na kane ka jingwan lyngshop jongka mariang.
U la ong “ Ka jingduh noh ïa kiba bun ki mynsiem briew hapoh kine ki khyndiat kynta ka la long kaba sngewsih bad na ka liang ka sorkar kan ai ki jingïarap sha kito ki long ïing kiba la ngat ha kane ka apot. Nalor kata ka sorkar kan pynbiang lut ruh nadong shadong ïa ki jingdonkam jong ki District ba kin ïoh ban ïarap kyrkieh ïa ki lanot shlei um bad twa khyndew”:.
Ha kane ka jingïalang na ka liang ki Deputy Commissioner (DC) ki la pyntip ïa ki lad ki lynti ba ki la shim ban ïarap ïa ki briew kiba la ïa kynduh ïa ki jingeh na ka jingshah pynjulor ki ïing ki sem, kiba iap ki la nang bun bad kumjuh ruh kumno ba la ïaleh katba lah ban pyllait im ïa kito kiba sah kut ha ka jingshlei um da kaba pynkynriah ïa ki shaki jaka ba shngaiñ ban sah.
Na ka liang u Myntri Rangbah u la kyntu ïa ki DC ba kin pynbiang ïa ka bam ka dih , ka umdih ïa kito kiba shah ktah bad khamtam ban pynkynriah noh sha ki jaka ba shngaiñ ïa kito kiba sah ha ki ïing kiba don hak a jingma. U la kyntu ba kin pynkhreh lypa bun ki jaka sah khnang ban pynthikna ba haba pynkynriah ïa ki na ki iing ki sem yn ïoh ban pynsah ïa ki ha kitei ki ïing basa.U la kular ruh ban pyllait kloi ïa ka pisa ai jingïarap ka sorkar sha kito ki long ïing kiba la mad ïa ka jingsngewsih na ka jingiap ki khun ki kti ne kiba haïing hasem jongki.
“ Ka jingshngaiñ jong ki paidbah ka long ka thong kaba hakhmat eh jong ka sorkar kumta nga kyntu jur ïa ki DC ban ïatrei lang bad ki bor synshar shnong ban tip ha kino ki jaka ba don jingma ne kiba dang lah ban shlei um khnang ban ïoh pynkynriah mar mar ïa ki briew”. ong u Myntri Rangbah.