Ka Sorkar kam lah ban kyntiew kyrdan ïa ki skul Adhoc sha ki Deficit: Rymbui

Shillong, Lber 23: U Myntri ka Tnad Pule Puthi ka Jylla ma Lahkmen Rymbui ula pynskhem ba ka Sorkar Jylla kam lah satia ban kyntiew kyrdan noh ïa ki skul Adhoc sha ka Deficit kat kum ka jingdawa jong ki Nonghikai Adhoc kiba dang pynlong ïa ka jingïakhih haduh mynta.
“Em! ngim lah satia ban kyntiew kyrdan ïa ki skul Adhoc ne jingshakri jong ki Nonghikai Adhoc sha ka Defficit” ong u Myntri haba kylli ïa kaei ka sienjam ba ka Sorkar kan shim halor ka jingdawa ki Nonghikai Adhoc ban kyntiew kyrdan ïa ka jingshakri jong ki.
Hynrei haba ïadei bad ka jingdawa pynkiew ïa ka tulop, u Myntri ula ong “Ki Nonghikai kila wan ïakynduh ïa nga bad nga la dep batai ruh ha ki..nga la kren ruh wat hapoh ka Ïingdorbar Thaw Aiñ ba kane ka kam ka dang don hapoh ka jingbishar jong ka Sorkar Jylla”.
“Nga la dep batai ïa kaei kaba ngin leh bad haduh katno ka Sorkar ka lah ban kyntiew ïa ka tulop haba pynshong nongrim ïa ka jingshakri jong ki, ka jingkiew dor ki mar ki mata, ka jinglut jingsep ba manka sngi” ula bynrap.
Halor ka jingkynnoh ba u Myntri u shu kular thok tang ban pynbijai ïa ka por bad pynjai jai ïa ka jingïakhih, u ma Lahkmen ula ong “Ngam don jingthmu satia ban ïalam bakla ne thok iano iano ruh bad nga ieng ha ka kyntien kaba nga la kren. Ngan pyndep ïa ka bad ka Sorkar kan leh ïa kaei kaba la kular”.
Haba phai pat sha ka jingdawa bad jingïakhih jong ki Nonghikai SSA ba dawa pyllait noh ïa ka tulop ba dang sah 2 bnai hashuwa ka 31 tarik Lber, u Myntri ula ïathuh “Nga la dep kren ha ki ba ngin pyllait noh ïa ka tulop jong ki hashuwa ka 31 tarik Lber kata hadien ba kut ka Dorbar Mang tyngka ka Jylla”.
“Nga la kren wat hapoh ka Ïingdorbar ïa kane bad nga khlem kylla ktien satia. Ka kam kala ïaid shaid shaid mynta ban pynkloi noh ïa kane ka jingsiew tulop” ong u ma Lahkmen