Ki Autonomous District Council (ADC) ki dei ki tnad treikam kiba la ïoh ka jingithuh na ka Riti Synshar jongka ri namar ka bor ba la pynkup ïa ki ka dei ka Sixth Schedule. Ka jingpyrshah ïa ka jingtyrwa jongka sorkar ban siew tulop jong ki nongtrei ki lai tylli ki ADC ha ka jylla ka dei hadien ba ka sorkar ka la ïohi ba lait na ka Khasi Hills Autonomous District Council (KHADC) ki ar tylli ki ADC kata ka Garo Hills Autonomous District Council (GHADC) bad ka Jaintia Hills Autonomous District Council (JHADC) ki dei ki Council kiba ym lah satia ban siew tulop thikna ïa ki nongtrei jongki. Kawei na ki daw ka long ba ka jingthung kam ha kitei ki ar tylli ki Council ka la long shaba palat pud ka la long thik kumba don kata ka jingong bam hati kit kulai.
Haba la mih ki jingtyrwa na ka sorkar ba kan bah khlieh ban siew tulop hi noh ïaki nongtrei jong baroh ki ADC ha ka jylla katba kim pat lah ban thaw ki lad ki lynti kumno ban lah ban pynmih pisa hi ban ïeng ha la ki kjat namar ka sorkar ka isynei ïa ki nongtrei kiba hap ban ap tulop da ki bun bun phew bnai ym tip shuh kumno ki bsa ki pyndap ïa la ki ïing ki sem jongki. Mih pynban ki jingpyrshah na kiba bun ba lang khamtam eh na ki Seng Bhalang kiba la shu pyrshah bad kynnoh ba ka sorkar kan sa pynïaid hi ïa ki ADC. Kane ka dei tang ka jingpyrkhat khyllung bad ka jingpyntieng kohtympan ïa ki nongtrei ka ADC. Hato kane ka lah mo ban jia ban long namar ïa ki ADC la ohshrong ha ka Riti Synshar ka ri kata ha ka Sixth Schedule ba kin long ki nongpeit nongri nongsumar ïa ki jaidbynriew riewlum ritpaid , ïa ka kolshor, ka tynrai, rukom im bad rukom synshar jongki.
Ka jingkylli ki mih hato haba ki nongtrei jong ki ADC ki duh tulop da ki bnai lynter ju don mo kita ki seng bhalang kiba wan shakhmat ban ïakhih ïa kata ka jingbym ïoh tulop jong ki nongtrei jongki District Council. Em ym pat ju ïohi satia haduh mynta hi ba kin don kum kita. Hynrei mynta pat ba ka sorkar ka buh jingtyrwa baroh baroh ki mih ban ïalam bakla. Kynmaw da lei lei ruh ka sorkar kam lah ban knieh ïa kata ka bor bad iktiar jong ki District Council namar ïa ki la ithuh da ka Riti Synshar jongka ri India. Ki dei ki Nongkynti jong ka Riti Synshar ka ri ym dei ba la thaw ïa ki tang da ki kynja Article kiba lah ban pynduh pyndam ha kano kano ka por hynrei la seng nongrim ïa ki ha ka Riti Synshar ka Ri.
Ban shu ong ba kin sa long kum kawei ka tnad sorkar ka bym lah ban long. Kumba long mynta ruh ka sorkar ka don hi te ka tnad kaba peit bad khmih ïa ki kam jong ki District Council kaba la tip kum ka District Council Affairs. Baroh ki kam ki jam ban poi sha ka sorkar ne sha u Lat ki hap ban poi lyngba kane ka tnad. Hynrei kane ka tnad kam don ka bor ban tuklar ïa ka rukom treikam jong ki District Council. Ki don la ka jongka bor bad ka Iktiar kumba la pynkup bor ïa ki da ka Riti Synshar ka ri. Kane ka tnad sorkar ka shu peit ban ïaid beit ki kam ki jam khamtam haba phah ïa ki Bill ban soi u Lat ka jylla. Haba ki District Council ki rai ban thaw aiñ ka sorkar jylla kam lah ban khang namar ki don la ka jong ka bor bad ka iktiar ban thaw aiñ. Lait noh tang lada ki aiñ kiba ki District Council ki thaw ki ïa tyngkhuh bad ki aiñ ba thaw da ka sorkar jylla te kata te ki hap ban pynkylla noh namar kim lah ban treikam. Kane ka long kumjuh wat ki aiñ ba thaw ka sorkar jylla ruh kim lah ban treikam lada ki ïa tyngkhuh bad ki ain kiba thaw da ka sorkar pdeng.
Kumta ban shu ong ba ka jingtyrwa jongka sorkar ban siew tulop ka dei ka jingthmu ban knieh ïa ki District Council bad ka dei hana tang ka buit election ba la jan ka election MDC ha Garo Hills ka dei tang ka nia ka bym don nongrim. Kumta ka jingkyntu ïa kito kibapyrshah ba kin da bishar bniah bad pule bniah ïa ka Riti Synshar ka ri khamtam ïa ka Sixth Schedule shwa ban kren bad kynthoh ei ei.
