Nongstoiñ, Ïaïong, 07: Ka jingïasoi ïa ka soskular ïa pynbeit pud hapdeng ka Meghalaya bad ka Assam, khlem da bishar bniah ïa ki jingai jingmut jong ki Regional Committee on Border Dispute bad ka jingleh kyrkieh jong ka sorkar, ka dei ka bym lah ban pdiang satia, ong u Dr Mukul Sangma Myntri Rangbah barim ka jylla, ha ka jingïalang kaba la long ha ka sngi balang jong kane ka taïew ha madan jong ka Malangkona Higher Secondary School kaba don ha Siminaguri.
Ka jingwan pynlong jingïalang jong u Dr.Mukul Sangma ha katei ka sngi, ka dei halor ka nongrim ban pynshai sha ki paitbah halor ka jingkhynñiat jubor ïa ki shnong ha ka thaiñ Malangkona, kiba dei ki shnong kiba hap hapoh ka Hima Nonglang Sirdarship, kum ka Namtarabari, Balsrek, Garojan, Rangsakona, Huwapara, Salbari, Joypur Amagaon bad kiwei kiwei ki shnong sha ka Assam, khlem da peit ne bishar bniah ïa ka jingkwah ki paitbah.
Ha katei ka jingïalang la ïoh ïa ka jingkren na ki riew rangbah kiba la ai jingkren ki long u bah Enos G.Momon President ka Malang Area Developmemt Organisation bad kiwei kiwei. U bah Momin haba kren ha katei ka jingïalang, u la ong ba ha shuwa ba ki ar ngut ki Myntri Rangbah, kata u Conrad Kongal Sangma bad u Himanta Biswa Sarma, kin leit ban ïasoi ïa ka soskular pynbeit pud sha Delhi, ki la leit ban ïakynduh ïa u Conrad Kongal Sangma, ban pynsngew ha u ba u dei ban peit bad bishar bniah ïa ki mat kiba la ai jingmut da ki Regional Committee, namar ba ki Chairman jong kitei ki Committte ki la wan jurip bad ban twad jingmut na ki paitbah.
Nalor kata u la ong ruh ba kat kum ka kaiphod ba kitei ki Committee ki la phah sha u Myntri Rangbah, la ong ba ïa ka jingpynbeit ïa u pud u sam yn pynshong nongrim katkum ka jinglong ki jaka, ka riti ka dustur, ka rukom bat khyndew bat shyiap, ka shongkha shongman bad ka kiwei kiwei.
U la ong ruh ba kaba pynsngewsih ïa kitei ki rangbah, ka long ba hadien ba ki la aiti ïa ka jingthoh kaba la ïasoi bad mynjur lang da ki paitbah shnong bad ki nongsynshar ba kim kwah ban leit sha Assam hynrei kin sah ha Megalaya u Myntri Rangbah u la pdiang. Hynrei kaba sngewsih ka long ba lyndet jong katei ka jingthoh u la dro map bad pyni ha ki ba ka jingpynbeit pud ka dei ban long kumba u la dro.
U bah Momin u la ong ruh ba u Myntri Rangbah um shym la pule satia ïa ka jingthoh jong ki, hynrei u la kylla lyndet bad u la dro pynban da u laiñ bad kdew da kaba ong artad ba ka jingpynbeit ïa u pud kan long kum ba u la dro ha katei ka kot sada. Ha kajuh ka por u bah Momin u la ong ba katei ka jingleh jong u Myntri Rangbah, ka pyni shai kdar ba um shym la kheiñ snep satia ïa ki bad ïa ki paidbah jong kitei ki shnong ba u la khynñiat jubor sha Assam wat haba ki paitbah kim kwah ruh.
U bah Momin u la buh jingkylli ruh ïa u Dr Mukul Sangma da kaba ong ba katkum ka jingtip jong u, ka jingïasoi ïa ka soskular pynbeit pud ka long katkum ka map kaba la dro ha u snem 2011 ha ka por ba u Dr.Mukul Sangma u dang long u Myntri Rangbah, ha kaba kitei ki shnong ki dei kiba don habar jong u laiñ jong katei ka map.
Hadien ka jingkren jong u bah Momin la ïoh ïa ka jingkren na u Dr.Mukul Sangma, ha kaba u la pynshai ba ka sorkar kam shym la don jingtip ei ei ha kaba ïadei bad ka map kaba la dro ha u snem 2011. Dei halor kata ka nongrim ba ka jingïapynbeit ïa u pud u sam ha ka por ba u dang long kum u Myntri Rangbah ka jylla ka la sah teng, namar ki hap ban da bishar bniah ha shuwa ban ïapynbeit.
Nalor kata u Dr Mukul Sangma u la ong ruh ba ka jingïasoi jong ki ar ngut ki Myntri Rangbah ban ïa ka soskular pynbeit pud ka dei kaba la shu leh kyrkieh khlem da bishar bniah. Ha kajuh ka por u la kynthoh jur ïa u Myntri Rangbah ka jylla u Conrad Kongal Sangma, da kaba ong ba u Conrad u la shu kohnguh beit katba ong u Himata Biswa Sarma, namar dalade um tip ei ei ruh em wat tang khyndiat ruh ha kaba ïadei bad u pud u sam.
Nalor kata u la ong ba u Conrad Sangma kum u Myntri Rangbah u la dei ban sngewthuh ba ka sorkar kam dei satia ka trai khyndew, namar kam don khyndew wat tang khyndiat ruh na lade, hynrei ka khyndew ka shyiap ka dei ka jong ki hima bad ki paitbah nong shong shnong kiba long trai ïa ki.
U la pyni nuksa ruh ba ha ka jingïadie ïa thied ïa ki jaka ha ki dulir, ki trai khyndew ki dei ban soi kata ruh hap ban soi lang da u lok bad ka lok bad lada ai bynta ïa ki khun ruh ha ki dulir u kpa bad ka kmie ki hap ban ïa soi lang. Hynrei kaba lyngngoh ka long ba shuwa ban leit ïasoi ïa ka soskular pynbeit pud, ka sorkar kam shym la khot ïa ki Syiem bad nongsynshar shnong ba kin pynshisha da kaba ïa soi da ki jingthoh kiba biang. Katei ka jingleh ka sorkar ka long ka jingthom bor im im peit peit ïa ka hok jong ki paitbah nongshong shnong bad ki nongsynshar hima.
