Ka Sorkar kam dei ban shu mynjur lut kat ïa kaba ki dawa: Adelbert

Shillong, Ïaiong 26 : U MLA ka Shillong North, Bah Adelbert Nongrum ha ka sngi Ba-ar u la ong ba ka sorkar jylla da lei lei kam dei satia ban shu kohnguh bad mynjur beit kat ïa kaba kito kiba sah ha Them-metor ki dawa.
“Ka sorkar kam dei satia ban shu pynsngew bha beit ïa ki watla katei ka ishu ban pynkynriah noh ïa ki na katei ka jaka, kadei kaba la sahteng la slem bha. Kadei ka jingshisha ba katei ka jaka ka hap ha constituency jongnga, hynrei ngam ju ïa shah satia,” ong u Bah Adelbert haba kren bad ki lad pathai khubor.
Shuh shuh u la ong ruh ba u la nang tharai ba kiban shah pynkynriah noh na katei ka jaka sha kawei pat kadei tang ïa kito kiba trei ha ki tnad bapher bapher jong ka sorkar. “Ha ka jingshisha dei ka tnad kaba ki trei kaba hap ban pynbiang ïa ki jaka sah,” la bynrap shuh shuh u MLA.
Kawei pat ka bynta kaba utei u MLA u kynthoh kadei halor ka jingdawa ba kitei kiba sah ha katei ka jaka ki buh bad dawa na ka sorkar jylla. “Naei ka sorkar kan ïoh pisa bad jaka ha kane ka por ba ka dor jaka ka rem bha. Lada kheiñ tang ha ki jaka bym dei European ward ruh ka dor kan poi beit 3000 shi square foot bad lada dei lei lei sha ki jaka European Ward ka dor kan poi beit 6000 tyngka.”
Kumta, halor kane, na ka liang u MLA u la ong ba ka sorkar jylla ka dei ruh ban kdew shai katno ngut na kitei ki 342 ngut ki dei kiba trei ha ki tnad sorkar bad ha kano ka tnad ki trei.
U ong ruh ba ka sorkar lada ka ai ïa kitei ki mat jingdawa, ka dei ruh ban leh kumjuh ïa kito kiba shong dukan ha jingkieng Motphran mynshwa hadien ba la pynpra noh ïa katei ka jingkieng khnang ba kin ïoh lang noh la ka jong ka jaka.
Ha kajuh ka por u la buh jingkylli ruh ïa ka sorkar halor ka jingïaid lait jongki ban kynthup lang ïa u ha katei ka committee khamtam eh ha shwa kin shim ïa ka rai kaba khatduh namar katei ka jaka kadei kaba dang hap ha constituency jong u hi.