Shillong, Nailur 16: Ka seng kaba don ha ka liang pyrshah ka Voice of the People Party (VPP) ha ka sngi nyngkong ka la dawa na ka sorkar jylla ban tohkit bad ban wad ïa ki daw halor ka jingkiew ki marbam khamtam ki marbam kiba kongsan ha kane ka jylla.
“Ngi kyntu ïa ka sorkar ban khmih bniah bad ban peit ïa ki jingtreikam jong ki khyrdop lum khajna bad ki khyrdop talasi ha shilynter ki surok bah kiba long ki daw jong ka jingkiew dor ki marbam ha kane ka jylla,” ong u General Secretary ka VPP bad u MP ka Shillong u Dr Ricky AJ Syngkon ha ka shithi ba la phah sha u Myntri Rangbah ka jylla u Conrad K Sangma.
Ha ka shithi la thoh ruh shaphang ka jingeh jong ki nongrep kiba shah pyndonkam ha ki nongkhaïi pdeng bad ba ka dei ruh ban don ka dor kaba la buh khnang ba kan long na ka bynta ka jingbha jong ki nongrep bad ki nongthied.
Na ka liang ka seng ka la banjur ruh halor ka jingdonkam ban pynkhlaiñ ïa ka tnat food and civil supply ban buh ïa ka dor ki marbam bad ban khmih ruh ïa ka jingpynkheiñ ïa ka dor ka mur bad ka kit ka bah khamtam ba mynta ba ïa ki kali heh ym pat shah ïaid na jingkieng Umïam bad na kane ka lah ban pynrem shuh shuh ïa ki marbam na ka daw jong ka kit ka bah.
“Naba ka jylla ka shaniah beit na ka jingwan ki marbam na shabar ka jylla, ka sorkar ka dei ban thaw ki lad ki lynti ban pynïoh ïa ka lynti ïaid ki kali kit marbam da ka lynti kaba lyngkot,” ong u Syngkon ha ka shithi.
“Lada ïa kine ki sienjam ym lah ban shim khia ha ka por kaba biang, kan pynlong ïa ka VPP ban shim ïa ki sienjam ban pynbor ïa ka sorkar kaba kynthup ïa ka jingïakhih kaba khlem sangeh, ban dawa ïa ka hok jong ki nongshong shnong ka jylla Meghalaya,” u la maham da kaba kyntu ïa ka sorkar ba kan shim khia halor kane ka jingdonkam kaba ktah ïa ki nongshong shnong.
Lah ban ong ba ha ka 13 tarik mynta u bnai, na ka liang ka VPP ka la pynlong ïa ka jingshong kyllaiñ myngor ha Madan Malki ban pynpaw ïa ka jingpyrshah haba ïadei bad ka jingkiew ki marbam ha Meghalaya. Katkum ka jingong u Dr. Syngkon, u la ong ba ka VPP ka ngeit ba ka jingdon ki khyrdop lum khajna ha ka jylla kadei kawei na ki daw ba la pynlong ïa ka jingkiew dor ki marbam ha ka jylla kaba la ktah ruh ïa ki nongrep bad ki nongthied nalor kiwei kiwei.
