Shillong, Nailur, 11: U MLA jong ka North Shillong Constituency u Bah Adelbert Nongrum u la kynthoh tyngeh halor ka jingkam jong ka Sorkar ba ka don hapdeng ka jinghiran pisa ban siew tulop sha ki nonghikai skul hynrei ka Sorkar ka shlan pat ban pan ram na kiba bun ki Funding Agency.
“Kaba pynlyngngoh ka long ba ka khajna kaba dei ban poi sha ka Sorkar ka lait sharud bad nga ïoh ksai ruh na kiba bun ki tnat ba ki la pyrshang ban buhrieh ne pynjah,” ong u Bah Adelbert.
“Ïa kane ka mat ngan sa rah ha ka Dorbar Synrai jong ka Iingdorbar Thawaiñ ka Jylla,” u la ong bad pynpaw ruh ka jingsngew bynñiaw la un ïoh neem ka lad ban buh jingkylli bad ruh ruh ïa kiwei de ki mat kiba bun namar ka jinglyngkot eh jong ki sngi shong dorbar.
Kane Dorbar Synrai kaba tang hynriew sngi jong ka Ïingdorbar Thawaiñ ka Jylla kan dei ruh ka dorbar ba khatduh eh jong kane ka samoi shwa ba ka jylla kan leit sha ka Elekshon jong ka Ingdorbar Thawaiñ ka ban sa long ha u snem 2023.
Ha kane ka Dorbar Synrai kiba bun na ki MLA, khamtam eh kiba don ha ka Liang Pyrshah bad ka Liang Synshar ki la pynkhreh ïa kiba bun ki mat buh jingkylli bad kiwei ki ban pynkhluid ruh ïa kane ka Dorbar Synrai.
U Bah Adelbert u la ong ba ha kane ka Dorbar Synrai u la pyrshang ban buh ïa ki jingkylli kiba ka Sorkar ruh kan lah ban ai ki jubab kiba shai ban long ka jingmyntoi ïa ki nongshong shnong ka jylla.
“Nga kyrmen kin wan ki phang kiba nga la buh ha kane ka dorbar, kum ka Industry, power, mining, Taxation, excise bad C&RD. Ngan sa rah ruh ha ka Private Members Bill ban pyndam noh ïa ka Aiñ Casino,” ong u Bah Adelbert.
U la ong ruh ba un sa rah ïa lai tylli ki Resolution halor ka Roster system , ka jingïasoi ïa ka Memorandum of Understanding (MoU) ïapynbeit pud hapdeng ka Meghalaya bad Assam, ka jingshem jynjynjar jong ki nonghikai skul bad ka kaiphod tohkit halor ka jingshah siat ïap u General Secretary barim ka HNLC u Bah Cheristerfield Thangkhiew nalor kiwei pat.
