Ka sorkar ka shu tep eitmiaw beit ïa ki jingbamsap halor ka khaïi dewiong beaiñ : Dr Mukul

Shillong, Jymmang 28 : U Myntri Rangbah ba rim ka jylla uba long ruh u Nongïalam ka Liang Pyrshah u Dr Mukul Sangma ula kynnoh ba kane ka sorkar Meghalaya Democratic Alliance (MDA) hapoh ka jingïalam ka NPP ka shu pyrshang beit ban tep eitmiaw ïa ki jingkynnoh bamsap ha ka kam khaïi dewiong beaiñ da kaba leh mynleh ban saitkhuid bad kyntait beit ïa ki jingkynnoh ïa kino kino ki jingleh bakla bad jingbam klop.
“ Kine ki briew kiba don ha ka bor ki leh mynleh beit kum kiba shu shah kynnoh khlem ki jingshisha.Lada kim dei ki jingshisha ka sorkar ka la dei ban leh da kaba tyngeh ïa kito kiba kynnoh pyrshah ïa ka bad dawa bai mynraiñ khmat ruh na ki” ong u Dr Mukul Sangma.
U la ong “ Hato ka sorkar ka nud ban leh kumta ban pynngat kyndon ïa kito ki briew kiba kynnoh bamsap ïa ka, kane ka pyni ba kim nud namar ki ïadon kti ha ki kam beaiñ bad bamsap”.
U la ong ki paidbah ki la dep pynpaw na ka por sha ka por ba ka donkam ka jingïatrei lang jong ki seng saiñ pyrthei ban pyllait ïa ka jylla na ka jingbamsap hynrei wat hapdeng ki jingmih ki khubor halor ka jingïadonkti ha ka kam khaïi dewiong beaiñ ka sorkar ha ka jaka ba kan shim khia ban phah tohkit hynrei ka leh matlah bad kyllut pynban bad shah ba kane ka kam khaïi dewiong beaiñ kan ïai bteng beit ha ka jylla.Kane ka jingleh sting ka pynpaw ba ki ïadon bynta ha kane ka kam kynnoh u Dr Mukul Sangma.
U la ong “ Kane ka pynpaw hi sha ki paidbah ba ki ïadon kti sop sop na kata ka daw ki pyrshang ban saitkhuid bad kyntait ïa kino kino ki jingkynnoh na kata ka daw nga ju kren bynniaw ba ka long kaei kaei kaba sngewsih ban ïohi kum kine ki jingjia kin jia ha ka jylla. Wat la katta ruh nga ïai dawa ba ka sorkar ka dei ban shim khia bad pynsangeh mardor ïa kine ki kam beaiñ bad bamsap kiba jia hapoh ka jylla. Dei ban pynsangeh mardor namar ngim kwah ban dang ïohi ïa ki jingjia ban dang ïai jia”.
U la ong “ Ka jignbamsap ka la pynjot ïa kiba bun ki ri ha ka pyrthei bad na kata ka daw ngim kwah ba ka jylla Meghalaya ruh kan jot kan pra ha ka kam bamsap namar lada kane kam sangeh ka lah ban poi shata ruh”.