Ka sorkar ka pyrshang ban pynhun ïa ki paidbah bad ka sngewnguh ïa ka jingïatrei lang : Dy. CM

Shillong, Naitung 11 : U Deputy Chief Minister ka jylla uba dei peit ïa ka tnad pynmih bording ka jylla (Power) u bah Prestone Tynsong ula pyntip ba ka tnad pynmih boring lem bad ka MeECL ki la shim ïa ka rai ban weng noh war naduh ka por shiteng miet jongka 11 tarik ïa ka jingpynlip bording ba 4 kynta lynter hapoh ka jylla. Halor kane u la pynpaw ka jingsngew nguh ïa ki paid nongshong shnong ka jylla kiba la ïatrei lang bad ka sorkar wat hapdeng kiba bun ki jingeh ba ki ïa kynduh bad u la ong ba na ka liang ka sorkar ruh ka pyrshang bad kan ïai pyrshang katba lah ban pynhun ïa ki paidbah ha baroh ki liang.
“ Hadien ka jingïa kynduh lang jong u CMD ka MeECL, ki Engineer, Director bad nga kum u Myntri ba peit ïa ka tnad ngi la rai ban weng noh ïa ka jingpynlip bording hapoh ka jylla naduh ka shiteng miet jongka 11 tarik ne 12 baje AM jong ka 12 tarik namar lai tylli na ki Unit kiba don jingthut ki la treikam mynta kata ka Umtrew Stage I bad II bad kawei ka Unit jongka OTPC bad NEEPCO ki la treikam bad la lah ban pynbiang bording ha ka jylla” ong u bah Prestone.
“ Ka sorkar ka sngewnguh eh ïaki paidbah kiba la ïatrei lang wat hapdeng ki jingeh bapher bapher ba ki ïa kynduh. Ka tnad MeECL kam banse ban shim ïa kane ka lynti hadien ba ki lai tylli ki Unit ne ki kor ki bor pynmih bording jongka ki thut kata ka Umtrew Stage I bad II bad ka Leshka Power Project. Nalor kata sa ka jong ka NEEPCO bad ka OTPC ruh ki thut. Kane ka la buh ïa ka tnad ha ka jingeh kaba khraw ban hap pynlip bording ha ka por lyiur da ka jingbym banse. Ngi ai khublei ïaki paidbah bad ngi kular ruh ban peit ba kan ym jia shuh haki por ban sa wan bad ngin ïai pyrshang ban pynhun beit ïa ka jingdonkam ki paidbah” ong biang u Deputy Chief Minister.
U la ïathuh wat la kine ki unit ki lah long ruh ka jylla ka dang mad ïa ka jingduna bording sa 1.05 million unit ha ka shisngi. Namar ka jingdonkam haka jylla ka long 9.95 million unit ha ka shisngi. Na kane 6.20 million unit kaba pyndonkam man la ka sngi bad 3.75 million unit kaba hap ban pynphai sha ka Power Banking kaba ju shim ha ki por ba tyrkhong um kata naduh Naiwieng haduh Kyllalyngkot ne Rymphang man la u snem.
Kumta ïa katei ka jingduna 1.05 Million Unit ka sorkar ka hap ban thied na kiwei ki kompani kaba mut ka hap ban shim bording na ki bad hap ban pynbiang biang ruh da ka bording hi.
Kumta sa shisien ubah Prestone u pynpaw ka jingsngewnguh ïa ki paid nongshong shnong ba ki la ïatrei lang wat la hap ban pyntreikam ïa ka jingpynlip bording bad u kyrpad ba kin dang ïai bteng ban ïai ïatreilang bad ka sorkar ne MeECL nangne shakhmat ruh.
U la kular ba ka sorkar kan pyrshang katba lah ban pynbha ïa baroh ki Transformer kiba la duh ha kiba bun ki shnong bad kumjuh ruh ïaki laiñ bording khnang ba ki paidbah kin ym ïa kynduh ïa kino kino ki jinglip bording nangne shakhmat.