Shillong, 14 Nailur: Ki nongïalam ka Khasi Jaintia Christian Leaders Forum (KJCLF) ha ka sngi Balang ka la leit ban ai jingthoh sha u Lamphang ka ïing dorbar thaw aiñ jylla kum ka dak ka jingpyrshah halor ka rai ka sorkar ban sdang noh ka jingpyntreikam ïa ka Gaming Act 2021 bad ka jingai license ban plie ïa ki ktem khalai ha Ribhoi.
Kane ka jingleit kynduh jong ki nongïalam ka KJCLF ka dei hadien ba u Myntri ka Taxation u James PK Sangma u la pyntip ha ka ïing dorbar ha ka 13 tarik Nailur ba ka sorkar ka lah dep ban ai 3 tylli ki License na ka bynta ban sdang bad tei ïa ki ktem khalai Casino wat la na ka liang u Myntri Rangbah u la kular ban sahngeh bad kane ka jingleh ka sorkar ka dei ka jingthok jingshukor ïa ki paidbah .
Haba kren bad ki lad pathai khubor u Secretary ka KJCLF u Rev. EH Kharkongor u la ong ba ka forum ka pynrem jur ïa kane ka jingleh ka sorkar namar dang shen ka la pynpaw ba kam pat don jingthmu eiei ban plie ïa kane ka ktem khalai bad u la ïathuh ruh ba ha ka jingïakynduh jong ki bad u Myntri Mangbah, na ka liang jong u u la kren pyntikna ba ïa kaba mynta ka sorkar ka nym pat pynïaid ïa kane ka kam.
U la ong, “Ka sorkar ka la thok ïa u paidbah namar ka la kular ban ym pat plie hynrei mynta ka la ïaid shakhmat bad leh sop sop bad la shu ïohsngew beit tang ïa ka jingpynbna na u Myntri ka Taxation ba ka sorkar ka lah ïaid shakhmat ha ka jingpyntreikam bad la dep ai ruh ïa ki License lai tylli”.
U la kynthoh ba ka jingkren u myntri ka Taxation ba ka jingpyntreikam jong ka sorkar ïa ka Gaming Act 2021 bad ka jingai license, ka long ban khring ïa ki nongjngoh kai pyrthei kiba heh spah bad kiba heh kyrdan, u Pastor EH Kharkongor u la buh jingkylli ba balei yn donkam ïa kita da kaba kdew ba watla khlem ka Casino ruh ka jylla ka ïoh pdiang da ki phew hajar ngut ki nongjngoh kai na kylleng ka pyrthei.
U la ong ba ka nongrim kaba kum ki nongïalam niam ka ïeng ban pyrshah ka long namar ba ki don ïa ka jingsngewkhia ïa ka lawei jong ki khynnah samla bad ka jylla hi baroh kawei. “Kaba thamula ka dei ba u ong, ki paidbah ka jylla kim ïoh bynta eiei lada dei ha ka kam ka jam ruh bad kin shu ïoh kai tang ki lyngkhot lyngkhai ha madan” U la bynrap.
