Ka sorkar ka la shim khia bha ban wad ïa ka khynnah kaba jah na Rajasimla, ong u Bah Prestone

Shillong, Nailur 09: U Symbud Myntri Rangbah ka jylla u u ba khmih ïa ka tnat Home (Police) u Bah Prestone Tynsong ha ka sngi baar u la pynthikna ba ka sorkar ka la shim khia bha haba ïadei bad ka jingjah jong ka khynnah kaba 6 snem na Upper Rajasimla kaba dang hab hapoh ka North Garo Hills district.
“Ngi la buh ïa kane ka kam hakhmat eh bad ngi la pyrshang ïa kiba bun ki lad ki lynti ban wanrah biang ïa kane ka khynnah sha la ka jong ka ïing ka sem bad ban pynïoh ruh ïa ka jingbishar kaba hok,” ong u Bah Tynsong haba jubab ïa ka zero hour notice ba la wanrah da u MLA ka Kharkutta u Rupert Momin ha Ïingdorbar Thaw aiñ ka jylla.
U la pyntip ruh ba ki pulit bad kiwei pat ki shnat ki la trei khlem shongthait ban wad ïa kane ka khynnah kaba la jah.
Kane ka khynnah ka la jah naduh ka 18 tarik u Naitung, 2025, ha ka por 1:30 nohphai sngi katba ki kmie ki kpa ki dang trei ïa ka MGNREGA scheme.
Ïa kane ka jingujor ba jah ka khynnah la ujor da u kpa hapoh ka Kharkutta Police Station, bad la sdang ruh ïa ka jingtohkit halor kane ka kam.
Ki pulit ha ryngkat lang bad kiwei ki shnat treikam ki la pynlong ïa ki jingwad bniah halor kane ka jingjia.
Ki la bun ki kynhun kiba kynthup ïa ki Special Force, Search bad ki Rescue Team, Fire and Emergency Services, bad ka K9 unit, kiba la leit ban wad ïa kane ka khynnah.