Ka Sorkar ka la pan jingïarap na ka Sorkar Pdeng ban plie sa 1500 tylli ki Anganwadi Centre: Paul
![](https://mawphor.com/wp-content/uploads/2023/04/Paul-1.jpg)
Shillong, Nailur 20 : U Myntri ka tnad Social Welfare ka sorkar jylla, Bah Paul Lyngdoh ha ka sngi Balang u la pyntip ha Ïing Dorbar ba ki don haduh 1500 tylli ki shnong ha kylleng ka jylla kiba ym pat don ïa ki Anganwadi Centre.
Haba jubab halor ka jingkylli ba wanrah da ka MLA na Ampati ka Miani D Shira u Myntri u la ong ruh ruh ba ka sorkar jylla ka la ïa kren bad ka sorkar pdeng na ka bynta ban pynïoh lut ïa ki centre ha baroh ki shnong.
“Ngi la dep phah ïa ka jingtyrwa sha ka Ministry of Women and Child Development ban kynthup lut noh ïa baroh ki shnong ki bym pat don ïa ki Anganwadi Centre,” u la ong da kaba bynrap ruh ba ka sorkar ka buh thong ba la kumno kumno hapoh ar snem kin sa lah ban buh ïa kitei ki centre ha kito ki shnong bym pat don.
Nalorkata, u Myntri u la pyntp ruh ba kito ki shnong kiba ym pat don ïa kitei ki centre ki don mynta ha ka jingpeit jong ka Early Childhood Development Programme.
U Myntri u la ïathuh ruh ba ha u Risaw un sa lum ïa ka jingïalang ban bishar ïa ka rukom treikam ki Anganwadi Centre ba don ha ka jylla bad un sa peit bniah ruh ïa ki jingeh kiba don ha kitei ki centre ha katei ka jingïalang.
Haba jubab halor ka jingkylli ba wanrah da u MLA ka Mawhati, Bah Charles Marngar halor ka jingsam da ki rice cooker sha ki anganwadi centre bym don bording na ka liang u Myntri u la jubab ba ka sorkar kan sa shimkhia ban wad da kiwei pat ki lad.
Halor ka jingkylli ba wanrah da u MLA ka Nongthymmai, Bah Charles Pyngrope, u Myntri u la ong ba ka sorkar ka dang khot mynta ïa ka EOI haba ïadei bad ka jingtyrwa ban ai noh da ki mobile sha ki nongtrei ha ki anganwandi centre khnang ba kin lah ban trei khambha katkum ba jingdawa ka kam.
Ka la don ruh ka jingai jingmut na u MLA ka Umsning Bah Celestine Lyngdoh ban pynbiang ïa ka umbam umdih ha kitei ki centre katba u MLA ka Amlarem Bah Lahkmen Rymbui u la kyntu ba donkam ka jingïatrei lang hapdeng ka tnad Social Welfare, Koit ka Khiah bad ka tnad pule puthi na bynta ka jingmyntoi ki khunlung khynnah.