Shillong, Ïaiong 24: Ka Sorkar Jylla lyngba ka Tnad Urban Affairs, kala ithuh ïa lai-saw tylli ki jaka ban pynkynriah ïa ki 342 tylli ki Longïing jong ki paid Harijan kiba shong ba sah ha Them Metor, Them Iew Mawlong.
“Ngi la dep ithuh ïa lai-saw tylli ki jaka na ka bynta ban pynkynriah ïa ki Longïing na Them Iew Mawlong” ong u ma Sniawbhalang Dhar, Myntri ka Tnad pynroi sor ka Jylla.
Hynrei ula ong pat ba ka rai ba khatduh kan shong eh ha ka jingïakren ka ban long hapdeng ka Sorkar Jylla bad ka Harijan Panchayat Committee (HPC). U ong ruh ba ka Sorkar Jylla kam lah satia ban shu bret ïa ki ha ki surok.
“Namar kata, ngi la pyrshang na ka Sorkar kumno ban pynbeit ïa kane ka kam. Ngin sa ïakren ha kata ka rukom ba kan nym pynmong iano iano ruh bad kane ka dei ka jingthmu jong ka Sorkar” ong u Myntri.
Haba kylli, u ma Sniawbha ula ong “Ka jingïakren ka dei kaba dang ïai bteng. Baroh arliang mamla ki don ïa ka jingthmu kaba bha bad kane ka dei ka dak kaba sngewtynnad eh ba ngin lah ban pynbeit noh khamkloi ïa ka kam”.
Ka jingïalang ka ban long biang hapdeng ka Sorkar ba ka HPC kan sa long mynta ka sngi nyngkong.
Ha ka jingïalang ba nyngkong ba long ha ka 13 tarik Ïaiong, ka Sorkar Jylla kala bthah ïa ka Tnad pynroi sor bad ka Shillong Municipal Board (SMB) ba kan ithuh ïa ki jaka ha kaban pynkynriah ïa ka Them Metor na Them Iew Mawlong.
U Symbud Myntri Rangbah ka Jylla Bah Prestone Tynsong ula pyntip ba ka HPC kala kyrpad ban leit ïakren ïa kane ka kam bad la ki jong ki briew bad hadien kan sa wan pynsngew pat sha ka Sorkar ha ka jingïalang bala buh ban long ha ka 25 tarik Ïaiong.
Haba kylli haduh ngut katno ki don ki nongshongbe-aiñ ha Them Metor, u Bah Prestone ula ong “Ki 342 tylli ki Longïing ha ka jingshisha ki dei baroh ki nongtrei sorkar ym tang kiba dang trei mynta hynrei kiba trei lehse 10-15 snem mynshuwa bad kumjuh ruh ki khun ki kti kiba dang trei”.
Kat kum ka jinglum jingkheiñ ka Shillong Municipal Board, haduh 184 ngut ki Nongtrei sorkar bad ki bahaïing hasem ki dei kiba la ithuh kum ki nongshongshnong bala ïoh jingbit. Kine ki kynthup ïa 128 ngut kiba trei ha SMB bad 56 ngut kiba trei ha ki Tnad treikam bapher bapher ka Jylla.
