Ka sorkar ka la dei ban wanrah da ka Resolution ban pynsangeh thmu tih Uranium: MLA Mawlai

Shillong, Nailur 21 : Namar ba lyngkot than ka por shong Dorbar Synrai ki MLA kumta ka jingkylli ba la phah bad pynkhreh ban wanrah hapoh ka ïing dorbar na ka bynta ban wanrah da ka Resolution ban sangeh syndon ïa ka jingthmu tih Uranium ha ka jylla kam shym ïoh lad ban poi bad ha ka jingshisha ka sorkar ka la dei ban warnah noh da ka Resolution ban rai da kawei ka sur ban sangeh beit ïa ka kam tih Uranium ha ka jylla, ong u MLA ka Mawlai Constituency u bah P. T Sawkmie.
Haba iakren bad u Mawphor u bah Sawkmie u la ong “ Nga la phah da ki jingkylli sha ka sorkar hato ka don ne em ka jingthmu ban wanrah syndon da ka Resolution ban phah sha ka sorkar pdeng ban sangeh syndon ïa ka jingthmu tih Uranium hapoh ka jylla, ha kane ka jing ïashong Dorbar Synrai ki MLA hynrei kane ka jingkylli kam shym la poi satia namar ki don bun ki jingkylli kiba shakhmat”
U bah Sawkmie u la ïathuh balei ba u buh ïa kane ka jingkylli namar u ïohi ba wat la ka sorkar jylla ka la rai ban ym shah tih Uranium shuh ha ka jylla hynrei na ka liang ka sorkar pdeng ka dang ïai bteng beit ban thaw ki lad ki lynti halor kane ka kam khamtam ba ka UCIL bad ka Atomic Energy ruh ka dang trei kam beit ban ïai tynruh ban tih ïa une u mar poh khyndew, kumta ban shai bad rai syndon ba ïa kane ka kam tih ïa une u mar poh khyndew ha ka jylla la pynsangeh syndon mardor la dei ban wanrah da ka Resolution hapoh ka ïing dorbar kumba la leh ïa kiwei kiwei ki mat jingdawa.
“ Ngi la wanrah ïa ka Resolution halor ka ILP, ka jingpynrung ïa ka ktien Khasi bad Garo ha ka Khyrnit kaba Phra bad mynta nga sngewdonkam ban wanrah sa ka Resolution ban khang syndon sbak ïa ka jingthmu tih Uranium ha ka jylla kumba ym shym la pdiang da ki paidbah bad khamtam eh mynta ïa ki jaka puta la long trai beit da ki trai ri trai muluk ym shuh da ka sorkar, kumta halor kine nga kwah ban pynthikna ba ïa kane ka kam ym dei shuh ban dang ïai khyllie shuh na ka por sha ka por hynrei ban pynsngap jar syndon ïa ka sorkar pdeng ban ym wan mushlia shuh ïa kane ka kam ha ka jylla” ong u bah P.T Sawkmie.