Shillong, Rymphang 27 : U Symbud Myntri Rangbah ba khmih ïa ka kam Pohïing (Police) Bah Prestone Tynsong ula pynpaw ba ka Sorkar ka long kaba kloi ban pynlong ïa ka jingkren ïasuk bad ka Hynniewtrep National Liberation Council (HNLC) hynrei ka jingkitkhlieh ka shong ha kane ka seng ban shim ïa ka ne ka bynta.
“Ka jingkhang sha ka jingkren ïasuk ka dang plie la ka dei na ka Sorkar India lane dei na ka Sorkar Jylla. Ka rai hi ka shong ha ki. Lada ki rai, ngin bteng biang ïa ka jingïakren hynrei lada kim rai, ngim lah ban ong eiei ïa kata” ong u Bah Prestone hadien ka jingwan pyndem u Area Commander ka HNLC ha Mairang.
U Bah Prestone ula kyntu ïa kiwei ki dkhot ka HNLC ba kin bud ïa ki dienjat u Area Commander bad ban wan im lang noh ha ka imlang sahlang.
“Ka jingkyntu jong nga sha kiwei ki dkhot ka long ba kin bud ïa kajuh ka dienjat bad wan noh sha ka imlang sahlang” ula ong.
Haba kren halor ki daw ka jingwan pyndem, u Bah Prestone ula ong “Ki don bun ki daw haba kut hi, namar ka jinglong samla, phi pyrkhat bha bad ong “ Nga hap ban wan phai noh sha ka imlang sahlang”.
U Symbud Myntri Rangbah ula kular ruh ban ai jingïada bad ka jingkyrshan ïa kito kiba wan ban pyndem wait.
“Ngi don hangne, ka Sorkar ka don hangne ban ïarap ïa phi shisien ba phi la wanphai, phin ïoh ïa ka jingïada ba pura” ong u Bah Prestone haba ban jur ïa ka jingthmu hok jong ka Sorkar ban pynshlur ïa ki dkhot ka HNLC ba kin wan phai noh sha ka imlang sahlang.
La kin dang don ki ban wan pyndem, u Bah Prestone ula ong “Ngam lah ban ong eiei halor kata” haba kyntait ruh ban kynthoh eiei halor ka jingkhlaiñ bor ka HNLC da kaba ong ba ïa ki jingtip ba bniah lah ban ïoh na Police Headquarter.
