Ka Sorkar ka don pisa ban thung Consultant, Chairman, ïa ngi kam don pisa: D. Lamare

Shillong, Risaw, 16: Ki nongïalam jong ka All Meghalaya SSA School Teachers’ Association (AMSSASTA) ha ka sngi Balang ki la takraiñ tyngeh ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) kaba ong ba kam don pisa ban kyntiew tulop ïa ki nonghikai skul SSA.
“Kam lah ban ong ba ka Sorkar kam don pisa. Ki khajna baroh ki leit sha ka Sorkar ym ba ka wan sha ngi. Kam lah ban long kumta. Hynrei ka dei ka jingaidaw. Ki don pisa ban siew ïa ki Consultant, ki don pisa ban siew ïa ki Chairman, ïa ki Co-Chairman, ki Vice Chairman balei kam don pisa ban siew ïa ngi ki nonghikai, hynrei ym dei tang ïa ngi, hynrei ïa kiwei ruh kiba donkam hapoh ka jylla. Kata kaba ngim lah ban pdiang daleilei ruh em,” la kynthoh u Vice President ka AMSSASTA u Bah D. Lamare ha ka jingïakren bad ki lad pathai khubor hadien ba la leit phai sha madan Malki na ka jingkhot ïakren jong u Myntri ka tnat Pule Puthi ka Sorkar Jylla u Rakkam A. Sangma.
U la ïathuh ba ka don ka jingïakren ha u snem 2016 bad ka Sorkar ka la buh ïa ka Corpus Fund hynrei kane kam dap. “Hynrei ka pisa ban mang la ka jong sha ka tnat pule puthi kam don. Ha ka jingshisha ka dei ban don. Lada ngi peit katkum ka rul bad kyndon ba la buh, 6 percent na ka GDP ka dei ban noh synñiang sha ka pule puthi. Ha ka jylla jong ngi, ngim pat ïohi ïa kata,” la bynrap u Bah Lamare.
“Naduh u 2019 ngi la pynkynmaw na ka por sha ka por ïa ka Sorkar lyngba ki dorkhas hynrei kaba sngewsih ka long tad haduh ba ngin da thiah madan kumne ki sa khih khohreh ban pynbit pynbiang ïa kita ki jingdawa. U Myntri ka tnat Pule Puthi ka Sorkar Jylla u Rakkam A. Sangma u la ïathuh ba ïa kane ka mat jingdawa ka tnat ka la phah sha ka State Education Commision (SEC),” la ong u Bah Lamare.
“Haba ngi kylli, u (Myntri) ong ba kan shimpor haduh u bnai Naiwieng ne Nohprah. Kata ka dei kaba jrong bad ki pyrkhang ban thied por ne ban pynjlan ïa ka por. Kane ka long kaei kaei kaba ngim sngewtynnat,” u la ong.
“Haoid, ngi ïaroh ïa ka Sorkar kaba la wanrah ïa ki katto katne ki lad ki lynti kumno ban khmih bniah ïa ki jingdawa jong ngi namarba la phra tylli ki snem kam don kano kano ka jingkyntiew tulop. Ngi ainguh ïa ka Sorkar kaba la pyrshang ban leh katto katne, hynrei haduh mynta ngi pat sngewhun ïa ka jingjubab,” la ong shuh shuh u Bah Lamare.
Ka AMSSASTA ka la pyntip ruh ba ka la phah jingthoh sha u Myntri Rangbah ban buh sngi na ka bynta ban ïakynduh hynrei haduh mynta ka ophis u Myntri Rangbah kam pat ai jubab eiei.
U Bah Lamare u la ïathuh ba ka jingkwah ban ïoh jubab markhmat na u Myntri Rangbah u Conrad K. Sangma ka dei namarba ka jubab jong u Myntri ka tnat Pule Puthi u Rakkam A. Sangma kam long satia kaba pynhun ïa ki nongïalam jong ka Association.
U President ka AMSSASTA u Bah Peter Thyrniang haba ïathuh ïa ka jingïakynduh ïa u Myntri ka tnat Pule Puthi u la ong, ïa ka jingslem ban pyllait ïa ka tulop jong u bnai Nailur, 2024 ka dei na ki katto katne ki jingthud hapoh ka ophis hynrei ka Sorkar kam shym la khang satia ïa ka tulop jong ki nonghikai namarba ka kynjoh haduh 16 sngi ka jingslem ban pyllait ïa ka tulop.
U la ïathuh ruh ba ka jingïakhih ba khlem pud sngi kan dang bteng beit haduh mynta bad kumjuh ruh yn sa pynjur ïa ki jingïakhih ha ki district bad khamtam ha Tura ban sa khot da ka jingïalang kaba heh ban pynpaw sha ka pyrthei ïa ka jingleh meinah jong ka Sorkar.
Shuh shuh u la ïathuh ba ka AMSSASTA ka la phah ïa ka dorkhas sha u Vice President ka ri India u Jagdeep Dhankhar, lyngba u Lat ka Jylla u C.H Vijayashankar, ha ka jingwan iuhkjat ha kane ka jylla mynta ka sngi Balang ba un tuklar lem halor ka jingdawa ban pynkiew tulop na ka Sorkar Meghalaya.
“Namarba u Myntri um lah ban ai ïa kano kano ka jingkular, ngi la rai ban bteng beit ïa ka jingïakhih katba ka Sorkar kam pat ai ïa ngi ïa ka jingdawa da ka jingthoh,” u la bynrap.