Ka sorkar ka don pisa ban leit sam pisa sha kiwei ki jylla, kam don pisa pat ïa ki nonghikai: Babu Boswell

Shillong, Nohprah 15: U President ka Khasi Jaintia Deficit School Teachers Association (KJDSTA) u Babu Boswell S Pala u la ong ba lada ka sorkar ka don ka pisa ban leit sam sha ki paidbah kadei ruh ban ai noh ïa ka Dearness Allowances bad kiwei ki jingsiew kiba ka dei ban ai sha ki nonghikai Deficit kiba la angnud la slem bha bad kaba la neh ruh mynta la kumba arsnem jong ka jingbym pat ïoh ïa ka Dearness Allowances kaba la neh beit thik 43%.
Haba kren ha ka jingïalang ki nonghikai ha madan Malki u la ong ba lada ka sorkar ka don pisa ban leit sam wat sha kiwei pat ki jylla kane ka thaiñ shatei lammihngi ka dei ruh ban pynlait noh ïa ka pisa kaba dei ban siew sha ki nonghikai.
Haba pynpaw ia ka jingbynniaw halor ka jingbym shim khia jong ka sorkar ia ki jingdawa jong ka seng u Babu Pala u la ong, “Lah palat 20 sngi ba ngi la buh ka shithi ban ïakynduh ïa u Myntri Rangbah ka jylla u Conrad Sangma, hynrei haduh mynta ka sorkar kam pat jubab kumta kane ka long kumba kheiñ beiñ ñion beiñ ïa ki jingdonkam ki nonghikai. Ngi la dep ïa kynduh teng mynshwa ïa u Myntri ka tnat Pule Puthi bad ha ka shi taïew la ikumba kan urlong noh ka jingdawa hynrei hadien shi taïew pat ka la long biang kumjuh, khlem lah ban pynurlong ïa ki jingdawa jong ngi ki nonghikai.”
“Lada ka sorkar ka leh bym suitñiew wat ïa ka eksam MBOSE ruh ngi hap ban leh eiei khnang ban pynbor ïa ka sorkar. Wat haba buh ïa ki jingkylli jong ki eksam ka sorkar kam kheiñ snep shuh ïa ki nonghikai, hynrei ka dei pat ban sngewthuh ba ki nonghikai ki don ka bynta kaba khraw bha halor kane ka kam set ne pynbiang ïa ki jingkylli MBOSE,” ong u Babu Pala.
Haba phai sha ka CM Guide Book u Babu Pala u la ong, “Ka kyntien ba pura jong ka CM Guide Book ka mut Cheap Marks Guide Book ha kaba ha ka jingthoh ba shadien la thoh ba lyngba kane ka Guide Book kan ïarap ban pynïoh haduh 60 ne 70 marks bad kaei kane bad mano ba donkti ban buh ïa kine ki jingthoh.”
U la ong ruh ba la katta bnai ka sorkar ka la buh ïa ka fund jong ki nonghikai hapoh ka Account katno ka la kha ka sut bad kumta ka la dei ban siew noh ïa ka pisa ba kaba dei hok ban ïoh da ki nonghikai.
Ha kane ka sngi la ïoh ruh ka jingkren na ka Miss Barbara Lamin General Secretary, u Babu E D Nongsiang Adviser, la pynïaid ïa ka jingïalang da u Babu Peter Marbaniang Organising Secretary ka Seng.