Shillong, Nailur 21 : U Symbud Myntri Rangbah ka jylla u bah Prestone Tynsong u la ong mynta ka sngi ba ka sorkar la dep rai ban buh syndon da u Full Stop uba heh halor ka Casino kaba mut ban ym shah plie Casino ha ka jylla Meghalaya.
Hynrei u la ong pat ban pynduh ïa ka Meghalaya Regulation Gaming Act 2021 kam dei namar lada leh kumta ka mut baroh ki kam ïa khalai ha ka jylla kin ïaid beaiñ khlem da don ka aiñ ban teh lakam ïaki.
U la ong “ Haba ka sorkar ka ong em mut em. Hooid lada phi kren ïa kata ka khajna ka long kaba shisha ba lada plie ïaki Casino ka khajna kan kiew hynrei ka sorkar ka burom ïa ka jingsngew bad jingpyrshah jong ki paidbah , ki seng bhalang bad seng niam bapher bapher. Na kata ka daw u Myntri Rangbah ka jylla u la kren shai kdar ban pynsangeh noh mardor ïa kane ka jingthmu plie casino”.
“ U Myntri Rangbah jongngi ula dep pynshai hapoh ka ïing dorbar bad kano kano kaba la wanrah hapohka ïing dorbar ka long kaba la pynskhem bad ym don ba lah ban ïeng pyrshah shuh. Ha kato ka sngi u Mytnri Rangbah ula ong ka jingtyrwa ban wanrah ïaki casino ha ka jylla ka la kut, ka la iap bad kine kiba la ïoh ïa ka provisional licenses ruh kin kut noh mynta u bnai Nailur 28 bad 29 tarik kumta yn ym don shuh ka jingpynthymmai ïa ki” ong u Symbud Myntri Rangbah.
Shuh shuh halor ka jingdawa ban pyndam pynduh ïaka Gambling Act u bah Prestone ula ong balei ba ka sorkar kan shu pynduh ïa kane ka aiñ lada ka long kumta baroh ki kam khalai kin long beaiñ lut ym don aiñ shuh ban teh langkam ïa ki kumta ïa kane ka aiñ donkam ban tehlakam ïakino kino ki kam khalai beaiñ.
“ Phi mut ban ong ka ba ka don ka jingpyrshah ïa ka jingthoh tim kaba la don naduh mynno, ïa ka jingïathong ïadur masi, ïa ka jingïakob khwai, jackpot bad ter ter, na kata ka daw ka don kane ka aiñ ban teh lakam ïaki namar kim lah ban leh katba ki mon bad ka dei ban long hapoh u pud u sam ka aiñ ym ban ïaid lait ïa ka aiñ” ong u Symbud Myntri Rangbah. U la ong ruh ba kam don ka jingïaid lait ïa ka Kynhun Myntri namar ha kaba nyngkong la mynjur shwa ïa ka Ordinance, hadien kane la wanrah kum ka Bill bad haba la mynjur ïak a Bill ka kylla kum ka Act ne aiñ bad nangta sa pynkhreh ïaki kyndon bad ïaki kyndon la mynjur da ka kynhun myntri kumta kam don kano kano ka jingïaid lait ïa ka kynhun myntri haba wanrah ïa kane ka aiñ.
