Nongpoh, Nailur 07: U Samla Albert Maring uwei naki khun samla naka shnong Umdap Dumu u ba don ka jingkitkhlieh naka bynta ka lawei jong ki khun samla haka dong Ri-Bhoi u la mih shakhmat ban pynpaw ba ka jingthmu jong ka sorkar ban wanrah ïaka ktem khalai ha Ri-Bhoi ka long kum ka jingkheiñ poh ban pynlong kum ka jaka theh ñiut bad ka ktem jong ki kam sniew ba bun jait ban pynjor ïaki khun samla.
Haba phah ïaka kyrwoh utei u samla u la pynpaw ba ka sorkar kala dei ban phaikhmat sha kiwei kiwei ki kam pynroi ban ai jingmyntoi ïaki paidbah khamtam ki ban kyntiew ïaki samla pule haka district kum ki jaka pule ba bei da ka sorkar, ki Medical College, Engineering College, ki jaka hikai kilan met kiba biang naka bynta ki nongïalehkai sports naduh ki madan kumba ka Ri-Bhoi District ka dei ka district kaba la ioh nam kum ka Aspirational District khamtam kaba la kiew ruh haka kyrdan kaba lai napdeng ki Aspirational District haka ri baroh kawei kaba long ka jingsarong kaba khraw ïaka district bad ka jylla baroh kawei.
U la ai jingmut ruh ïaka sorkar ba ka dei ban pynbha shuh shuh ïaka tnad ka koit ka khiah ha Ri-Bhoi ban plie thymmai ïaki jaka ai jingsumar ha kiba bun ki jaka ba ki paidbah ki dang shem jingeh bad jngai naki jaka sumar, ban kyntiew ïaki samla ïalehkai haka district kumba ka Ri-Bhoi District kadei kawei naki district kaba pynmih shibun ki nongïalehkai sports ba paw wat shabar jylla.
Namarkata ka sorkar kam dei ban pyrkhat bad pynleit jingmut ïaka ktem khalai hynrei ban phaikhmat bad wanrah ïaki kam pynroi ki ban ai jingmyntoi bad kyntiew ïaka district, khamtam ki khun samla kiba bun naki ki shu ud halor ka kyrduh kam kyrduh jam, u la bynrap.
