Ka sorkar ka dei ban thoh shaka sorkar pdeng ba la khyllip ïa ka lynnong tih Uranium ha Meghalaya

Shillong, Nailar 1 : Ka sorkar Meghalaya Democratic Alliance (MDA) ka dei ban ai da ka jingthoh sha ka sorkar pdeng ba ïa ka kam tih uranium hapoh ka jylla la dep khylliap lynnong ne la pynkut naduh u 2016 namar ha kato ka por hadien ba la jur ki jingïakhih pyrshah na ki seng bhalang ka sorkar ka la dep shim rai ban ym shah ïa ka UCIL ban tih uranium haka jylla bad wat ki trai jaka ruh ki la dep rai ban ym ai jaka ne mynjur ban tih ïa utei u mar poh khyndew ha “Kylleng-Pyndengsohiong-Mawthabah Uranium Mining Project” ong u MLA ka Mawlai u bah Process T.Sawkmie.
Haba ïakren bad u nongthoh khubor hadien ba la mih biang kane ka mat tih uranium ha ka jylla ha kaba u Myntri ka sorkar pdeng u Dr Jitendra Sing uba dei peit ïa ka tnad Atomic Energy ula jubab ha ïing dorbar thaw aiñ Parliament ba kane ka projek tih uranium ha Meghalaya kam pat kut satia, na ka liang u bah Process u la ong “ Ka sorkar pdeng ka dei ban tip shai kdar ba ka sorkar jylla naduh u 2016 ha ka por ba dang ïalam ïa ka sorkar da u Myntri Rangbah Dr Mukul Sangma ka la dep rai ba kan ym ai permission da lei lei ruh ban tih ïa u uranium ha kane ka jylla. Nalor kata wat ki trai khyndew trai jaka ruh ki la dep shim rai ban ym ai wat tang shi inshi ruh ka jaka ban pyndonkam da ka UCIL ban tih uranium namar ki pyrshah jur ïa ka jingtih uranium haka jylla”.
“ Kumta ym don jingmyntoi shuh ban ïakren bad ïa khyllie biang halor kane ka mat namar ka dei kaba la iap bad kaba la dep khylliap lynnong naduh u 2016 bad ka sorkar pdeng ruh kam dei ban dang phai khmat sha ka jylla namar ka jylla ryngkat ki paid nongshong shnong kin ym pdiang da lei lei ruh ban tih ïa u uranium hapoh ka jylla namar la tip shai kdar ba ka jingtih ïa une u mar poh khyndew kan wanrah ka jingma kaba khraw ïa ki paidbah ha ka liang ka koit ka khiah kumba la ïohi nuksa sha kiwei ki jaka” ong u bah Process
“ Dei halor kane ka nongrim nga ban jur ïa ka sorkar jylla ba ka dei ban ai da ka jingthoh sha ka sorkar pdeng ba ïa kane ka kam la dep pynwai bad la dep rai da ka sorkar jylla ban ym shah da lei lei ruh ban tih ïa u uranium hapoh ka jylla” pynkut u bah Sawkmie.