Ka Sorkar ka dei ban sei madan ïa kiba donkti ban siat ïap ïa u Bah Cherish: HM Shangpliang

By Mawphor Editor On Sep 10, 2022

Shillong, Nailur, 09: U MLA jong ka All India Trianool Congress na Mawsynram Constituency u Bah Himalaya M. Shangpliang u la dawa ba ka Sorkar Meghalaya Democratic Alliance (MDA) ka dei ban sei madan ïa ki Pulit kiba donkti ban siat ïap ïa u Bah Cheristarfield Thangkhiew ha ka jingleit khynra ïa ka ing sah jong u ha Mawlai Kynton Massar ha ka step phyrngab ka 13 tarik, Nailar, 2021.
“Nga shem ba kane ka jingleit khynra ban jia kat kane ka jingjia ba sngewsih kat haduh ba u Bah Cherish un da khladnoh ka dei ka kam ka bym khuid. Nga suba jur ïa kiei kiei kiba don ha kane ka kam. Nga lah ban ong ba ka dei ka jingïasylla (Criminal Conspiracy) ha kane ka jingkhynra,” ong u Bah Shangpliang ha ka jingïakren bad ki lad pathai khubor hadien ba la ïoh pdiang ïa ka kaiphod tohkit jong u Nongbishar T. Vaiphei kaba la wanrah da ka Sorkar Jylla ha ka sngi sdang jong ka Dorbar Synrai ka Iingdorbar Thawaiñ kaba la long ha ka sngi Thohdieng.
“Kaei ka daw kaba ki Pulit kim lah ban ap haban da shai ban khot ban pyrta, sa kem bad sa rah (ïa u Bah Cheris),” la buh jingkylli u Bah Shangphliang.
“Balei kim (Pulit) shym rah lang bad ki Night Vision Device (NVD) ban ithuh. Ki (Pulit) kynoh ba don u briew uba wan tur sha ki ban ïaleh pyrshah ïa ki hynrei kumno pat ki ithuh haba kim don ïa ki Night Vision Device (NVD). Kata ka dei tang ka jingpharep,” la kynne une u MLA ka Mawsynram ïa ki Pulit.
“Ha nga, nga sngew ba kane ka kaiphod ka dei kaba biang bad u nongbishar T. Vaiphei u la leh ïa kaba dei ban leh kat kaba u shem bad ka la don ka jingleh palat pud ïa ka bor da ki Pulit kat haduh ba ngi la duh ïa u Bah Cheris,” la bynrap u Bah Shangpliang.
“Ïa kaei kaba la jia, nga dawa na ka Sorkar ba dei ban pynshitom ïa kiba donkti ha kane ka kam. Nga ïohi ba ha ka kaiphod tohkit la thoh ba dei ban pynshitom bad la kdew ruh ba yn sa pan jingpynshai, hynrei ka Sorkar ka dei ban pynshai sha u paidbah kaei ka jingthmu jong ka Sorkar,” u la ong.
“Ka Sorkar ka dei ban sei madan lut ïa ki briew kiba donkti ha kane ka kam bad pynshitom katkum ka kam,” la dawa u Bah Shangpliang.
Haba kylli u la ong, “Ngin sa buh ka jingdawa ïa ka Sorkar bad ba ngim dei ban shu sngap manman bad ngi dei ban buddien ba ka Sorkar ka dei ban pynshitom ïa ki briew kiba donkti ha kane ka kam ban shim ïa ka jingim jong u Bah Cheris,” la ong u Bah Shangpliang.