Ka Sorkar ka dei ban pynthikna noh ban ïa ka tarik ban wan jurip ïa ka Langpih Sector

Nongstoiñ, Jylliew, 23: Ka jingpynslem jong ki dkhot ka Regional Committtee on Brder Dispute ban wan jurip ïa ki jaka ki puta bad ki shnong ki thaw kiba hap ha ka Langpih sector shuwa ba u Myntri Rangbah ka jylla Meghalata bad u Myntri Rangbah ka jylla Assam kin ïakren sngewthuh jingmut na ka bynta ban pynbeit ïa u pud u sam ba thikna ka la pyn lynga bad pynpisa jingmut ïa ki paitbah katei ka thaiñ.
U bah Swingly Samakha sordar shnong barim ka Langpih bad u bah S.P.Nongphud, uwei na ki riew rangbah ka thaiñ haba ïakren bad u nongthoh khubor mynta ka sngi, ki la ong ba naduh ba ka sorkar ka la pynthymmai ïa u Chairman ka Regional Committee bad ki dkhot ba kin peit ïa katei ka kam bad ka la pynbna ruh ba ha u bnai Jymmang, u nongïalam ka Regional Committee bad ki dkhot kin sa hiar sha katei ka thaiñ ban pyndep ïa ka kamram ba la bynshet, ki paitbah ki la sdang ïoh mynsiem bad ki la sdang ban sngew shngaiñ. Namar ba naduh ki snem ba la dep ki la dep ai sha ka sorkar ïa ki jingthoh jingtar ban pyni ïa ki jingshisha ba ki paitbah ki kwah ban sah ha Meghalaya. Ki la ong ruh ba kaba lyngngoh ka long ba haduh ba kut u bnai Jymmang u Chairman bad ki dkhot ka Regional Committee kim shym pat la wan mih satia ha katei ka thaiñ.
Kitei ki rangbah ki la ong ruh ba hadien ba u bnai Jymmang u la kut, ka sorkar ka la pynbna biang lyngba ki lad pathai khubor ba hapoh u bnai Jylliew ki nongïalam ka Regional Committee, kin pyndep noh ban leit sha ka thaiñ Langpih ban jurip ïa ka jinglong jingman bad ban sngap ïa ka sur na ki paitbah nongshong shnong.
Hynrei, na ka daw ba ka sorkar ka khlem buh ïa ka tarik, hynrei ka la shu shaniah beit ha ka Regional Committee ba kan pynbeit hi. Kumta ka la pynduh jingkyrmen haduh katta katta ïa ki paitbah. Ki la ong ruh ba ha u snem ban wan ka la dei ka Election MP ha baroh ki jylla ka thaiñ shatei lam mihngi, kumta lada ka Regional Committee kam lah ban pyndep hapoh une u bnai Jylliew ne u Naitung ban wan, la thikna ba ka lah ban sahteng haduh u snem 2024.
Ki la ong ruh ba lada jia ba ha ka Election MP ka sorkar BJP ha Assam kan ym wan shuh ha ka bor, kan shem jingeh haduh katta katta ba kan bteng biang ïa katei ka kam. Namar ba ha kine ki snem ba ka jingpynbeit pud ha ka wat ba nyngkong ha ki hynriew tylli ki jaka kiba don jingïakajia kiba kynthup ruh ïa ki bynta jong ka West Khasi Hills, ka dei namar ba u Conrad Kongal Sangma Myntri Rangbah ka Meghalaya u don ka jingïadei kaba jan eh bad u Himanta Biswa Sarma u Myntri Rangbah ka Assam ha kaba ki la lah ban leh kumto kumba ka long.
Kumta ha kaba ïadei bad katei ka mat ki la kyntu ïa ka Regional Committee on Border Dispute ba ka dei ban pynkloi noh, khnang ba ki paitbah kin nym sah ha ka umdum la ki dei ban shah khynñiat sha Assam ne kin dang shah kynthup hapoh Megha-laya ruh.