Ka sorkar ka dei ban kren shai kdar halor ka jingpyntreikam ïa ka Roster System : KSU

Shillong, Jylliew 25 : Ka Khasi Student Union (KSU) ka dawa ba ka sorkar ka dei ban kren shai kdar halor ka jingpyntreikam ïa ka Roster System la kan long naduh kaba sdang ne nangne shakhmat.
“Ngi la dep kren shai ba ngi ïeng ha ka nongrim ba ïa ka Roster System dei ban pyntreikam nangne shakhmat hynrei kat kum ka Office Memorandum (OM) ba thymmai ba la pynmih da ka sorkar kam kren shai satia la ka jingpyntreikam ïa ka Roster System kan long naduh ba sdang kata naduh 1972 ne nangne shakhmat” ong u President ka KSU u samla Lambokstarwell Marngar haba ïakren bad ki nongthoh khubor.
Haba buh jingkylli ïa ki briew kiba bad thaw bad pynkhreh ïa ka OM ba thymmai, u samla Lambokstar u la ong “ Kane ka OM ba thymmai ka long kaba kyllaiñ bad pynkulmar jingmut bha bad kumta ngi kwah ban kren shai bad phah khubor da kaba shai sha ka sorkar ba kam dei ban shu pynbiej ne pynthame ïa ki paidbah da kumne kumta hynrei ban rai beit ban pyntreikam beit ïa ka Roster nangne shakhmat. Kito kiba thaw bad pynkhreh ïa kane ka OM ba thymmai ki hap ban shim ka jingkit khlieh bad ka sorkar lada jia kano kano kaba sngewsih na kane ka jingpynkulmar jingmut ïa ki paidbah” ong biang u Samla Lambokstar.
“ Ka sorkar ka dei ban pyrkhat sani bha na ka bynta ka lawei ki khun samla ha ka jylla da kaba ym ban pynartatien ïa ki namar kumba long mynta kim sngewthuh sngewthaw halor ka jingpyntreikam ïa ka Roster System hapoh ka jylla” ong une u nongïalam ka KSU.
Kane ka OM ba thymmai halor ka Reservation Policy kumno ban pyntreikam ïa ka Roster kaba la pynmih da ka tnad Personnel & Administrative Reforms (B) Department ha ka 14 tarik Jylliew 2024 kam shym la kren shai kdar la ka jingpyntreikam ïa ka Roster kan long naduh ba sdang ne nangne shakhmat.
La shu bthah ba baroh ki tnad sorkar ki dei ban thung la ki jong ki Grievance Redressal Officer (GRO) ban peit bad bishar lada don kino kino ki jingthut ne jingwit haba la pyntreikam ïa ka Roster hapoh ka jylla. ïa kane ka OM la pynmih hadien ba la rai da ka Kynhun Myntri ban pynthymmai ïa ka OM kaba la dep pynmih ha ka 10 tarik Jymmang 2022.
“ Man la ki tnad sorkar ki dei ban thung da ki ophisar kiba la rim bad rangbah kiba ha ka kyrdan ym duna Under Secretary shalor kum ki GRO khnang ba lada don kino kino ki kynrum kynram haba pyntreikam ïa ka Roster System kin ïoh ban peit bad pynbeit kloi” ong ka OM ba thymmai.
Nalor kata ka la ong shuh shuh “ Kino kino kiba ïa kynduh jingeh na ka jingpyntreikam ïa ka Roster System ki dei ban ai ka jingujor sha u ne ka GRO khnang ba kin peit bad pynbeit ïa kum kita hapoh ka por ba tang ar bnai kata nduh ka sngi ba ïoh pdiang ïa ka jingujor”.
Nalor kata ka shu batai ba ka Reservation ïa ki Post na ka bynta ki Shedule Tribe bad Shedule caste kan long beit kat kum ka Reservation Policy kaba pynmih ha ka 12 tarik Kyllalyngkot 1972.