Ka Sorkar ka dei ban khot ïakren ïa ki Sengbhalang ban wanphai biang ka jingshong shngaiñ : Process

Shillong, Naiwieng 25 : Ka sorkar MDA ka la dei ban khot ïakren noh ïa ki Seng Bhalang, ki Rangbah Shnong, ki Nongïalam Niam na ka bynta ban ïa pyrkhat bad thaw ki lad ki lynti kumno ban wanrah biang ïa ka shongsuk shongsaiñ ne kumno yn leh ban wan phai biang ka jingshongsuk shongsaiñ.
“ Ka sorkar ka la dei ban shim khia ïa kane ka kam kloi katba lah bad khot ïakren noh ïa ki Seng Bhalang bapher bapher ki Rangbah Shnong kynthup ïaki Rangbah Shnong ka Mukroh, ki Nongïalam Niam bapher bapher ban ïa syllok bad ïamir jingmut lang kumno ban thaw lad ban wanrah ïa ka jingshongsuk shongsaiñ ha kane ka jylla khamtam haka nongbah Shillong khnang ba kane ka jingjia na Mukroh kan ym kylla ka jingïashun ia isih jaidbynriew. Namar ym lah ban tip kaei ka ban jia lada ïai pynslem ban ïakren sngewthuh bad wanrah kloi ïa ka shongsuk shong shngaiñ ha ka jylla bad kumjuh ruh ha ki bynta khappud” ong u bah P.T Sawkmie MLA ka Mawlai haba ïakren bad u nongthoh khubor.
U la ong ruh katba ka sorkar pdeng kam pat ai ïa ka Notification ban shimti tohkit ka CBI ka kynhun tohkit ba la thung da ka sorkar ka Special Investigation Team (SIT) ba la khlieh da u DIG ka dei ban sdang noh shaid shaid ïa ka jingtohkit ban paw ki jingshisha baroh.
Kawei pat kaba u la kyntu ïaka sorkar ka long ban weng noh ïa ka jingkhang ïa ka Internet. “Hooid ha kato ka por ba la jia ka jingjia ngi sngewthuh ka sorkar ka khang khnang ban ym pur sted kino kino ki khubor hamsaia kiba lah ban ktah ïa ka shongsuk shongsaiñ hynrei mynta ba la dep kular da ka sorkar pdeng ban phah tohkit da ka CBI bad kumjuh ba ka sorkar ruh ka la dep thung ïa ka jingtohkit SIT kumta la dei ban weng noh ïa ka jingkhang Internet namar ha kane ka juk mynta ba la ïa im naduh ka kamai kajih haduh ka pule puthi lyngba ka internet kane ka jingkhang ka ktah jur bad ka ktah wat ïa ka kamai kajih ki paidbah ruh. Kumta nga kyntu ïa ka sorkar ban bishar bniah bad weng noh ïa kane ka jingkhang ïa ka internet” ong u bah P.T Sawkmie.
Halor ka jingduna ka umphniang petrol ha ka nongbah bad jylla hi u la ong hooid ka DC ka la pynpaw ba ka petrol ka pahuh hynrei kiba bun ki petrol pump ki la duna petrol namar bun kiba la khang. Hynrei da ka jingwan poi ki kali kit petrol mynta ka janmiet sha kane ka nongbah la kyrmen skhem ba ki bor synshar district kin shim khia ban ai ka jingïada ïa ki khnang ban ym thut bad duna shuh ka umphniang petrol ha ka jylla.