Nongpoh, Naitung, 12: Ka sorkar jylla kala dei ban pan bad dawa ka bhah thungkam haki tnad treikam jong ka sorkar pdeng bapher bapher kiba don haka jylla naduh ka NEIGRIHMS, NEEPCO, NEHU, ICAR bad kiwei kiwei kumba 50% da ki trai muluk ba kynthup ïaki Khasi, Jaintia bad Garo.
Ha ka jingshisha haba wan ki shlem treikam ne ki shlem ai jinghikai hapoh ka jylla ki nongshong shnong jong ka jylla naduh ki Khasi Jaintia bad Garo ki dei ban ïoh lad ban rung kam kham bun kumba long sha kiwei ki jylla, ki nongshong shnong jong ki trai jylla ki ïoh khambun ka kam ka jam, hynrei ha Meghalaya bun naki nongtrei haki tnad treikam jong ka sorkar pdeng kiba don haka jylla ki dei kiba wan na kiwei kiwei ki jylla jong ka ri India bad ïoh ban wan trei sahuh katba mon.
Namarkata ka sorkar ka la dei ban kren bad dawa ka bhah thungkam naka sorkar pdeng ba dei ban thungkam kham bun da ki trai muluk jong ka jylla, ym dei shuh ban dang ailad ïaki briew ba nabar ka jylla ban ïoh rungkam haki tnad ophis sorkar bad ki tnad ai jinghikai jong ka sorkar pdeng ba don hapoh ka jylla, khnang ba ki khun samla jong ka jylla kin ïohkam ïohjam.
