Shillong, Nailur, 14: U Symbud Myntri Rangbah ka Jylla u Bah Prestone Tynsong ha ka sngi Balang u la ong ba kam don satia kano kano ka jingthmu jong ka Sorkar ban weng ïa ki nongdie madan khlem da ai jaka bujli ba kin die ïa ki mar ki mata jong ki.
Haba jubab ïa ka Zero Hour Notice ba la wanrah da u MLA ka Mawlai u Bah PT Sawkmie ha ka Iingdorbar Thawaiñ u Bah Tynsong u la ong ba ka jingthmu ka long tang ban shu pynbeit ryntih khnang ba ki nongdie madan kin ym kyntur than naba kan ktah pat ïa ka ïaid ka ieng ki paidbah bad ka leit ka wan jong ki kali.
“Ngi la shimkhia ïa kane ka kam bad ngin sa leh ruh ha ka lynti kaba dei,” u la ong.
U la ong, khnang ban weng ïa ka jingeh jong ki nongdie madan bad ban pynthikna ba kan don da ka aiñ ban pynryntih ïa ka jingdie madan bad harud surok, ka Sorkar ka la wanrah ïa ka Aiñ-Rew ha kane ka Dorbar Synrai ban pyndam noh ïa ka Meghalaya Street Vendors (Protection of Livelihood Regulation of Street Vending) Rules 2022 bad ban pdiang da ka Street Vendors (Protection of Livelihood and Regulation of Street Vending) Act, 2014 ba la thaw da ka Sorkar India.
U la ong, ka Aiñ-Rew/Aiñ kan ailad ban sorjamin ïa ka jaka shong die jingdie ki nongdie madan, ban pynrung kyrteng ïa ki nongdie madan, ban ithuh ïa ki jaka die madan, ban pynkynriah ïa ki nongdie madan ba la pynrung kyrteng sha ki Vending Zones, ban thaw ïa ki Town Vending Committee, ban thaw ïa ka tnat ba peit ïa ka jingeh jong ki bad kiwei kiwei.
U la pyntip ruh ba ka Meghalaya Street Vendors (Protection of Livelihood Regulation of Street Vending) Rules, 2022 ka dei kaba la pynbna da ka Sorkar Jylla.
Ha kaba ïadei bad ka jingpynbeit ryntih ïa ka jingdie madan ha ki jaka sor jong ka Jylla, ka Sorkar Jylla la mynjur ïa ka Meghalaya Street Vendors (Protection of Livelihood and Regulation of Street Vending) Act, 2014.
Ïa ka Street Vendors (Protection of Livelihood and Regulation of Street Vending) Rules, 2017 bad ïa ka Street Vendors (Protection of Livelihood and Regulation of Street Vending) Scheme, 2017 la shna ban peitngor ha ki kam ba ïadei bad ka jingdie madan.
Hapoh ka jylli jong ka Aiñ ba la shna da ka jylla, ki don haduh 1249 ngut ki nongdie madan kiba ladep pynrung kyrteng /ithuh ha ki 6 tyllli ki jaka Municipal jong ka Jylla.
Na kine, tang 342 ngut ki nongdie madan kiba la pynrung kyrteng ha nongbah Shillong.
U Bah Tynsong u la ong ba ka jingduna jong ki nongdie madan ban pynrung kyrteng ka dei na ka daw ka jingdon ka mukotduma ba la pynkut noh da ka Ïingbishar High Court ha kaba ka seng ki nongdie madan kaba la tip kum ka Meghalaya & Greater Shillong Progressive Hawkers & Street Vendors Association (M&GSPH&SVA), bad kiwei kiwei, ki la ujor pyrshah ïa ka aiñ ba shna da ka Sorkar bad dawa ban pyntreikam da ka aiñ jong ka Sorkar Pdeng ïa kaba la pyntreikam kyllum ha ka ri baroh kawei.
Bun na ki nongdie madan ha nongbah Shillong ki dei ki dkhot jong ka Association, bad kane ka kynhun ka la ieng pyrshah ïa ka jingthmu ban pyntreikam da ka aiñ jong ka Sorkar Jylla kat haduh ba ki la mudui da ka PIL.
U la ong shuh shuh hadien ba la pynkut noh ïa kane ka mukotduma ha ka 24 tarik, Nailar, ka Ïingbishar High Court ha ka hukum kaba la pynmih ha ka 16 tarik, Nailar ka la bthah ïa ka Sorkar Jylla ban shimkhia ïa kane ka mat kaba ïadei bad ki nongdie madan kiba shong die jingdie ha ki lynti ïaid kjat bad kiba pynwit ïa ka leit ka wan jong ki paidbah ha ka rukom kaba pyrkhing.
Da kaba pynshong nongrim katkum kane ka jingbthah jong ka Ïingbishar, ka Sorkar Jylla lyngba ka ophis jong ka Deputy Commissioner ka East Khasi Hills ka la thaw ïa ka Komit ba la khlieh da ki Executive Magistrate ban ithuh ïa ki jaka shong die madan bad ban weng ïa kiba kyntur palat pud.
La pynmih ruh ïa ka hukum sha ki komiti bapher bapher ba kin jurip ïa ki jaka ba shong ki nongdie madan bad ban shim ïa ki lad ki lynti kum ha kaba pynkynriah ïa ki nongdie madan, ban pynduna ïa ki dukan ha ki lynti ïaid kjat, ban weng lut ki dukan tap shiliang bad kiwei kiwei khnang ban ïada na ka jingkyntur pud sha ki lynti ïaid kjat bad ki surok ïaid kali.
Ïa kane ka jingsorjamin la pyndep hapoh 10 sngi khlem kano kano ka jingleh donbor hynrei tang ban pynthikna ba kan ym don kano kano ka jingpynwit ïa ki lynti ïaid kjat bad ki surok ïaid kali.
