Ka Sorkar Jylla ka dei ban shimkhia ban peit kyrpang bad kyntiew ïa ki nongrep ha Meghalaya

Nongstoiñ, Ïaiong, 09: Ka jingkyrkhu U Blei Nongbuh Nongthaw ïa ka West Khasi Hills bad ïa ka Jylla baroh kawei lyngba ki jingbuh bad tynsad ïa ki Marpoh Khyndew kiba kordor, ki Khlaw ki Btap, ka Mariang kaba itynnad, ka Lyer ring Mynsiem kaba khuid, ki Wah kiba sngur, ki Lum kiba pyngngad bad ki Umdih kiba Shngiam ka la shlei shisha.
Lyngba kine ki jingkyrkhu kiba khraw katne, la pynlong ruh ïa ki paidbah nongshong shnong kiba shong ba sah ha ka ban sumar khuid kat lah kat ïai, namar ba ki longtrai ïa la ka khyndew ka shyiap, ka lyngkha ka risa, ïa ka Bri ka kper bad khamtam ïa ka khih ka kamai.
Ka Khyndew ban rep ban riang ha ka Jylla, ka long kaba seisoh bad kaba bha haduh katta katta. Na ka jingman bha jong ka khyndew ban rep, ki paidbah nongshong shnong jong kawei pa kawei ka shnong, kim ju kyrduh bam. Nalor nangta, da ka jingbha jong ka suiñ bneng bad sboh ka khyndew, ki nongrep ki ïaleh ban pynneh ïa ka rukom rep tynrai khlem dawai bad rep tang da ka sboh mariang, kaba la tip haka juk mynta kum ka rep ‘Organic’. Kane ka rukom rep ka la ai jingmyntoi shibun eh ïa ka koit ka khiah jong ki paidbah kiba bam jhur.
Hapdeng kine ki jingdon jingem ba pahuh pahai, ki paidbah nongshong shnong khamtam kiba don ha ka West Khasi Hills District haduh mynta, ki dang shaniah tylli ha ka rep ka riang. Lyngba ka kam rep la lah ban kyrshan ban pyndap bam baroh shi snem. Don napdeng ki snem kiba la lynshop da ki bor jong ka mariang kaba la pynïam kthang ïa bun tylli ki longïing jong ki nongrep. Hynrei kum ki nongrep, da ka mynsiem ïakhun kim shym kynran dien ban rep, hynrei ki dang thaw lad da bun ki rukom rep khnang ba kin lah ban kyrshan ïa ka bam ka dih haïing ha sem.
Lah ban kdew ba tang ki shnong kiba hap ha ka thaiñ Mawthadraishan, ki la lah ban pynmih ïa ki mar rep kiba la lah ban pynïaid iew da kaba shalan sha bar jylla. Kane ka la wanrah ka jingmyntoi shikatdei eh ïa baroh ki nongrep. Ha ka thaiñ Laitkseh naduh Marngor bad ha ki thaiñ Markasa, ki la shim kyrpang ban pynlong ïa u Biskot kum u mar rep ba kongsan. Ïa une u mar rep nalor ba bam hi, la die ruh ha ki iew ki hat jong ka Ri Khasi bad la khaïi shaduh sha bar jylla.
Ha ka thaiñ Mawkamoit, Myrïaw ki la shim kyrpang ïa u sohsaw kum u mar rep ba kongsan bad ïa u sohsaw na thaiñ Myrïaw la die ha ki iew jong ka Ri Khasi bad kaba kham jur ka jingkhaïi ka long sha Assam.
Kine ki ar tylli ki mar rep kum u Biskot bad Sohsaw tang na ka thaiñ Mawthadraishan, la pynïaid iew sha Assam bad ka la long ka jingkyrkhu ïa ki nongrep kiba rep ïa kine ki mar rep. Ki paid nongrep kiba ju khaïi nangne sha ki jaka iew kiba ju rep ïa u Kba, u Phan, riewhadem, prisbin, kajor, ki soh bad kiwei kiwei mynta, ki khmih lynti ba kine ki mar rep ruh kin sa lah ban shalan sha bar jylla, khnang ban ïoh jingmyntoi shuh shuh lyngba ka kam rep.
Pynban, katne ka jingdem diap ban im dukhi ha ka rep ka riang ban pynbiang mar rep ha iew ha hat, hynrei ym shym la don kino kino ki lad ïarap na liang ki bor ba dei khmih ban kyntiew khambha ïa ki nongrep kiba long ki Païa ïa ki iew ki hat ha ka Bri u Hynñiewtrep.
Kumta ka por ka la dei eh ban pyni jingmut lem ba ka Sorkar kan sdang ban khmih kyrpang noh sha kane ka bynta. Ka sorkar lyngba ka tnad rep, kan pyrkhat thymmai bad janai da kaba kan plie ïa ki iew khaïi ïa ki mar rep sha ki Ri ba marjan bad sha ki Jylla jong ka Ri India. Lada ym lah plie ïa ki iew khaïi shabar ri ruh, ka sorkar ka la dei ban wanrah bad pynurlong noh da ki kharkhana pynmih marbam da ki mar rep kiba rep na kane ka jylla Meghalaya.
Ka sorkar ka la dei ban thaw lad thaw lynti ba ki mar rep kum u Biskot, la dei ban wanrah noh da ki kharkhana tylliat jingbam sniang, ïa u sohsaw la dei ban wanrah da ka kharkhana shna Sauce, ïa u riewhadem dei ban wanrah da ka kharkhana tylliat cornflakes, ïa u phan da ka kharkhana shna Chips bad ïa ki soh da ka kharkhana shna Jam bad umsoh. Nangta ïa kiwei kiwei ruh ki mar rep ruh, dei ban wanrah da ki kharkhana pynmih mar bam bapher bapher, khnang ba kan long ka jingkyrkhu ïa ki paidbah nongrep jong ka thaiñ West Khasi Hills bad ïa ka Jylla hi baroh kawei.