Ka Sorkar ha jaka ban kyntiew ïa kiba sengkam, ka tan pynban bad pynshlur ïa kiba kamai beaiñ: Adelbert

Shillong, Risaw 26: U MLA ka 17th North Shillong Constituency u Bah Adelbert Nongrum u la kynnoh ba ka sorkar jylla ha ka jaka ba kan kyntiew ïa ki samla kiba sengkam lajong hynrei ka kylla long pynban kum ka nongtan pynban ïa ki shapoh bad ha ka jaka ba kan ïarap ïa ki samla kiba treikam lajong kiba ïaid da ka aiñ hynrei dalade hi ka pynshlur pynban ïa ki kam beaiñ bad ong ruh ba kum u nongmihkhmat ne ka sorkar dei ban ong ïa ki samla bym donkam ban ïeng ha la ki jong ki kjat ban kyntiew ïalade ym pat ban shah tan shapoh.
Ïa kane u Bah Nongrum u la kren ha ka prokram pynlait paidbah ïa ka Ambulance bad ki E-Scooter jong ka Jaïaw Ehrngiew Transports Society (JETS) ha ka jingïadonlang u MDC ka 19th Jaïaw Constituency u Bah Denzil Chen bad kiwei kiwei kaba la pynlong ha Jaïaw Lower Lansonalane hapoh compound ïing jong u Bah K M Warjri.
“Nga kynmaw ba ka jingïakhun jong ka JETS kam dei bad kiwei kiwei kiba ñiah ar shaka hynrei bad kiwei ki company ba nabar kum ki kompeni Rapido kiba nabar jylla bad haba nga kylli na u Myntri ka tnat Transport ka jylla u Bah Sniawbhalang Dhar haba nga kynduh markhmat ban pynlait noh ïa ka allotment order sha ka JETS u la ong ba la dep ban pynlait lut ïa baroh ki permit, hynrei ka JETS ka khlem pat ïoh, kumta nga kwah ban phah ka khubor kaba shai ïa u Myntri ba u dei ban pynlait noh kloi kloi ïa ka allotment order sha ka JETS ba kin ïoh ïa ka hok bad kumno kum ka sorkar kaba dei ban kyntiew ka kylla long pynban kum ka nongtan shapoh kumta nga phah ka khubor sha ka sorkar ba ngin sa shong pyrkhat ïa kaei kaba dei ban leh bad ban ïakhih na ka bynta ka hok watla hap ban pynhiar ïa ka kyrdan la jong namar donkam ban pyrkhat ïa ka kyrdan jong ka jylla bad ïa ki samla ym ïa ka kyrdan lade shimet bad ngi hap long kiba leh da ka bor ban pynkohnguh ïa ka sorkar,” ong u Bah Nongrum.
U la ong ba mynta lah 3 snem la ailad ïa kiwei ban kamai khlem laisen ban leh ki kam khaïi beaiñ hangne ha jylla bad hato lah mo ban shah haba ïohi ïa ka jinglong bym shngaiñ ha kane ka jylla.
“Nga kwah ban pynpaw ïa kito kiba kynthoh lai phew jait ba ngam don por ban sngap ban ïakren bad ki snaïap hynrei ngan jubab da ka kam bad kum ki JETS kiba pyni da ka kam bad ngi hap namarkata, ban leh eiei lada ka sorkar kam leh eiei kloi halor ka kam ban pynlait noh ïa ka allotment order naba nga sngew synei ïa ki khun samla ba mynta la 1 snem ki shu ap sah ïa ka kam bad hadien ba ngi la aipor mynta la 2 taïew khlem pat ïohi ïa ka jubab na ka sorkar bad sngewdei ban ong ba ngin sa shong pyrkhat kaei kaba dei ban leh pyrshah ïa ka sorkar kampher na ka bynta ka hok ki khun samla,” u la bynrap.
U la ong ruh ba donkam ban kren haba shit ba shai ba baroh ki 60 ngut ki MLA la ha ka liang pyrshah ne ha ka liang synshar baroh ki don ka thong ban saiñdur ïa ka jylla bad ka don ka por ban ïaroh bad ban pyrshah. “Ha kane ka por nga kwah ban buh ka jingkylli ïa u Symbud Myntri Rangbah u Bah Sniawbhalang Dhar ba un pynlait noh ïa ka allotment order sha ka JETS ha shwa ba ngin rai da kumwei pat,” u la ong.
Haba ai mynsiem bad pynshlur ïa ki nongseng jong ka kompeni JETS u la ong, “U Blei u la ai ha ngi ïa ki kti ki kjat ban trei ban ktah, kumta ym lah ban ong ba kam don ka kam ka jam ne ban khmih lynti sah ïa ki kam sorkar bad kine ki samla mynta kiba la nang la stad ki la pyni da ka kam ba ki la seng ïa ka kompeni JETS bad JETS 24*7 ka pyni ba ki lah kumta balei kiwei pat kim lah bad ngim dei ban shu long tang ki nongwad kam hynrei ban long ki nongai kam, ki nongthaw kam, ki nongpynmih kam bad nga sngew khyllew bad sarong ba ka JETS ka dei ka kompeni kaba mih hi na la ka jylla la jong.”
Katba u MDC u Bah Denzil Chen u la ïathuh ba ka party VPP lada ka wan ha ka bor ka la buh lypa ha khmat ban kyntiew ïa ka pule puthi bad ka Koit ka Khiah nalor kiwei kiwei ki kam bad u la ai khublei kyrpang ruh ïa ka JETS kaba la lah ban leh kat kane ka kam kaba ratbah ban shakri ïa ki nongshong shnong bad khamtam ban kyntiew ïa ki samla.
Katba u President ka JETS bad u Managing Director ka JETS 24*7 u Bah Pynskhemlang Uriah u la ïathuh ba la sdang ïa ka JETS ban ïarap ïa ki samla khlem kam khlem jam ne ki bym biang ka kamai kajih. Haba batai shai halor ka jingsngewthuh bakla ki paidbah ïa ka JETS bad ka JETS 24*7 u la ong, “Halor ka JETS 24*7 ka dei hi kaba la mih na ka JETS hynrei kiba pynïaid ka ïapher namar ki don la ka jong ka kynhun ha ka imlang sahlang. Hapoh ka JETS ka don ka JETS 24*7, ka TASTE of Tribe, ka R and R Homestay, ka JETS Food Corner bad kiwei ki projek ba ngin pyntreikam.”
Ha kane ka sngi na ka liang u MLA kum u kongsan bad u MDC kum u Symbud Kongsan ki la pynlait paidbah ïa ka Ambulance bad ïa ki E-Scooter bad ïathuh ruh ba ka kam shakri ka dei ban ïaid lang ruh bad ka kam khaïi bad ki nongpynïaid ïa kane ka kompeni ki la kyntu ïa ki samla kiba duna ka ïoh ka kot ki bym kot bor ban thied ïa ki Scooter ki lah ban wan mih sha kane ka kompeni da kaba pyndonkam ïa kine ki arshaka ban kamai.