Ka jingpynbna jong u Myntri ka tnat Jngohkai Pyrthei u Bah Paul Lyngdoh ba ki projek ki ban sa pyntreikam da ka tnat Tourism ki ban kot haduh 400 klur tyngka ki la pynrhem mynsiem ïa ki briew kiba ju im kamai jakpoh da kane ka kam ha kylleng jong ka jylla.
Katkum ka jingïathuh jong u Myntri, ki don project ba la bei tyngka da ka Asian Development Bank (ADB) kaba la kot T. 191 klur bad kumjuh ruh na ka state plan ba la mang pisa T. 227 klur ban shna ïa ki jingtei ha kiba bun ki jaka jong ka jylla Meghalaya.
Kumba ka paw ki tnat treikam kiba la bat da u Bah Paul Lyngdoh ki la paw pyrthei shisha naduh ka tnat Social Welfare, ka tnat Jngohkai Pyrthei, ka tnat Arts and Culture bad wat ka tnat Textile kaba ym da kham paw bha ha ki snem kiba la leit noh.
Naduh ka sngi kaba u Bah Paul u la ïoh doh kyndang da ka jingbate kam da u Myntri Rangbah u la pynpaw sha ki lad pathai khubor ba kine ki dei ki tnat kiba kongsan kiba lah ban pyntyllun ïa ki kam kiba ïadei bad ki kam kiba manla na ka bynta ka bha ka miat jong ki paidbah.
Haduh mynta, ka tnat Tourism ka la paw pyrthei bha namar ka jingbun palat jong ki samla kiba la nang la stad ki bym ïohkam ïohkam kiba la pyrshang katba don la ka buit ka bor ban phaikhmat na ka bynta ban pyntyllun ïa kam jngohkai pythei ha kylleng ki bynta jong ka jylla. Ym don kawei ruh ka jaka jngohkai pyrthei kaba dang ïoh rung ei hynrei ki Dorbar Shnong, ki Hima, ki kynhun bapher ki la mih shakhmat ban pyntyllun ïa ki kam jngohkai pyrthei da kaba wad ïa ki lad ki lynti na ka Sorkar Jylla kaba mang kyrpang ïa ki skhim bapher bapher ban shna ïa ki surok, ban shna ïa ki Home Stay bad kiwei kiwei ki jingdonkam ban kyntiew irat ïa kane ka kam.
Hynrei haba phai sha ki samla kiba im kamai jakpoh ban kit ïa ki nongleit shang suwari hapoh ka jylla, ki ïakynduh mawsiang namarba ka Sorkar Meghalaya kam don ïa ka polisi kumba long ha kiwei ki jylla jong ka thaiñ Shatei Lammihngi kiba khang ïa ki kali kiba nabar ban kit ïa ki nongshang suwari sha ki jaka jngohkai pyrthei.
Ka All Khasi Hills Meghalaya Tourist Taxis Association kaba long ka synjuk jong ki briew kiba im kamai jakpoh da ka kam ñiah kali ban kit ïa ki nongjngohkai pyrthei ki ud ki bynñiaw ïa ka jingmynthi jong ka Sorkar ha kine ki khyndiat bnai baladep hynrei toi watla katta ka Sorkar ka la hap ban pyndem ïa ka jingdawa ban thaw da ka komiti ba kyrpang ban ïathir ïatai ïa ki jingeh jong ki nongkamai kali.
Ka shong sa ha ka jingkut jingmut bad ka rai ba stad jong ka Sorkar kumno ban weng ïa u shiah uba thar namarba ka jingjyllei jong ki kali Tourist kiba wan shapoh ka jylla ka long kaba shyrkhei haduh katta katta baroh saw samoi. Dei tang da ka jingïasyllok lang bad ki kynhun kiba pynïaid ïa ki kam jngohkai pyrthei, kiba iing basa, kiba aiwai ïa ki kali Tourist yn sa lah ban weng ïa u shiah uba thar khnang ban ka jingthmu kaba bha kan wanrah jingïohnong ïa ki trai jylla hynrei ym ïa ki briew kiba nabar kiba shu wan kamai spah ban knieh kynthet ïa ka pliangja jong ki trai ri trai muluk.
Ka Laitlum, Ward’s Lake, krem Mawsmai, krem Arwah, Nohkalikai, Dainthlen, Mawlynnong, Mawkdok, Golflink, Shnongpdeng, Krangsuri bad kiwei kiwei ki dei ki jaka jngohkai pyrthei kiba kham paw ha rilum Khasi bad kiba la long ka pliangja jong ki trai jylla namar kata ka Sorkar ka ladei ban wanrah da ka polisi kaba kyrpang ban khanglad ïa ka jingshah knieh ka pliangja jong ki trai muluk bad ban khanglad ruh ïa ka jingpynjaboh ïa ka mei mariang da ki nongjngohkai pyrthei na ka jylla, nabar ka jylla bad nabar ri.
