Shillong, Jylliew 01: Ka Sohïong Presbyterian Secondary School, mynta ka sngi ka la rakhe ïa ïa u mawjam ka jingïaid lynti ba sanphew snem jong ka da kaba pynlong ïa ka jingrakhe kaba iphuh iphieng.
U Pastor HL Syiemlieh, Secretary jong ka Managing Committee jong ka Skul, u la ïathuh ba ïa kane ka skul la seng ha ka 1 tarik u Jymmang ka snem 1973 kum ka Primary Svhool. Hynrei katba nang mih ki snem, ki khynnah skul ki la nang bun kumta ha ka snem 1994 la kyntiew kyrdan sha ka Middle English School bad ha ka snem 1998 la kyntiew kyrdan sha ka Secondary School. Ka skul mynta ka don 639 ngut ki khynnah Skul bad 18 ngut ki Nonghikai.
Ka Balang Presbyterian Sohïong kadei ka Sponsoring Body jong ka skul bad ki nonghikai ki ïoh da ka tulop adhoc grant na ka sorkar.
U Kongsan uba la wan plie ïa kane ka jingrakhe udei u MLA jong ka Sohïong, u Bah Synsharlang Kupar Lyngdoh. Haba kren ha kane ka jingïalang, u Bah Synshar u la ong ba wat lada um dei u khynnah jong kane ka skul, hynrei u kynmaw ïa ki por khynnah pat haba u ju wan ha kane ka skul ban shong ha ki skul pynpaw ba ju pynlong ka Balang Presbyterian Sohïong. Nangta ban ïashim bynta ha ki drama bad kiwei kiwei. U kyntu ruh ïa ki khynnah skul bad ki kmie ki kpa ban ïaleh katba lah ban ïa beh sha ka jingstad bad kiar na ka jingpep skul shiteng por. Shuh shuh u la ong ba kane ka juk kam dei shuh ka juk ban shu pyndep tang ïa ka matrik, hynrei kadei ka juk kaba la kumno kumnoki samla kidei ban don ka jingangnud ban pyndep ïa ka Graduate shaneng. U la kular ruh na ka liang jong u, un ïa don bynta ha kino kino ki jingdonkam ba ka skul ka donkam.
U Pastor JR Thabah, uba long u Khynnah Skul barim badba ju bat teng ruh kum u Secretary ka MC jong ka skul, u la pynkynpaw kumno ka Balang Presbyterian Sohïong bad ki dkhot ka Balang, ki la trei shitom ban pynïeng ïa kane ka skul da kaba puh da u mohkhiew bad sher da u lyngka ban pynmadan ïa kane ka jaka na ka bynta ban pynïeng ïa kane ka skul.
Laïoh ruh ïa ka jingkren na ka Balang Sohïong, nangta na ka Jingïaseng Kynthei bad ka Jingïaseng Samla Balang Sohïong bad kumjuh ruh na iwei na ki khynnah skul barim jong ka skul, iba long iwei napdeng ki lai ngut ki khynnah skul ba la pass ïa ka eksam Matrik nyngkong eh na kane ka skul.
U Kongsan u la pynher ïa ka lama kum ka dak ka jingsdang jong ka Jubili Ksiar bad la pynphuh pynphieng ïa kane ka jingplie ïa ka jingrakhe da ka drill bad jingrwai na ki khynnah skul, ka jingrwai na ka Jingïaseng Samla Balang Sohïong. La pynïaid ïa ka jingïalang da u Rev. TJ Thabah, Chairman ka Managing Committee. La ïa don lang ruh ki khynnah skul, ki khynnah skul barim, ki kmie ki kpa bad ki dkhot ka Balang Presbyterian Sohïong.
