Ka social media ka dei ka iktiar jingïarap hynrei bun ki pynlong ka rynsan ïakput ïabeiñ bad thad pynjah burom

Albert Maring, Ri-Bhoi District

Nongpoh, Rymphang 15 : Ha kine ki sngi, ka jingïar jong ka social media bad ki kor ka science & technology ka la wanrah ka jingkylla kaba khraw ha ka jingim paidbah. Lyngba ki lad kum ka WhatsApp, Instagram, Facebook, YouTube bad kiwei kiwei, la lah ban pyndep bun jait ki kam naduh kiba rit haduh kiba heh khlem jingeh. Ka la ai jingïarap shibun ïa ki nongrep, ki nongkhaii, ki nongtrei sorkar, ki khynnah skul, ki samla pule bad kiwei pat. Ha kiba tip bad nang ban pyndonkam hok, ka social media ka long ka atiar kaba ai jingmyntoi bad pynsuk ïa ki kam ki jam man la ka sngi.
Hynrei, ha kajuh ka por, lada ym tip ban pyndonkam bha, ka social media ka lah ban kylla long pynban ka daw jong ki jingeh. Ka la kylla kum ka rynsan jingïatim, jingïabeiñ bad jingïathad para briew. Ki paidbah ki ju pyni paidbah ïa ki jingleh ba man ka sngi, ki dur ki dar bad ki kam shimet haduh ba ka la poi sha ka jingpynjah burom para briew. Don ruh kiba pyndonkam ïa ka kum ka lad ban kput bad thad para briew halor ki kam iing kam sem, kam kur ne kam shnong, kaba ju wanrah jingïashun ha ka imlang ka sahlang.
Ka jingpyndonkam palat ne bakla ka la pynmih ruh bun jait ki kam sniew kum ki kam thok, kam tuh, kam lute bad ki kam runar lyngba ki online services, kiba pyntieng pynsyier ïa ki paidbah. Ym tang katta, hynrei ka la don ruh ka jingktah ha ki jingïadei longïing longsem, wat ban poi sha ka jingïaphet tnga tang na ka daw ka jingshah pynthame ne jingïakren bakla ha ki rynsan social media.
Namarkata, ka long kaba donkam ba ngin tip ban pyndonkam ïa ka social media ha ka rukom kaba don jingkitkhlieh bad kaba ai jingmyntoi ïa ngi hi bad ïa ka imlang ka sahlang. Ngi dei ban kiar na ka jingpyndonkam bakla kaba lah ban wanrah jingma bad pynmynsaw ïa ka nam bad ka burom jong ngi bad para briew.