Ka Sngi U Blei kam dei tang ka sngi mane, hynrei ka sngi jong ki jinghikai ba kordor
P. Sohkhlet
![](https://mawphor.com/wp-content/uploads/2022/07/Article.jpg)
Shillong, Risaw 24: Ha kine ki sngi kiba bun ki paidbah ki la ïashim bynta ban ïatai ha kaba ïadei bad ka jingpynlong ïa ka Cherry Blossom Festival ha ka Sngi U Blei. Don kiba la pyrshah bad don ruh kiba la kyrshan ïa kane ka jingpynlong ha ka Sngi U Blei.
Kiba pyrshah ki la ai daw ba ka Sngi U Blei kadei ka sngi kaba kyrpang bad ka sngi ba kyntang jong ki Khristan. Kumta kam sngewdei ban pynlong ïa ki Tamasa ha kaba kum kane ka sngi. Kiba pyrshah pat ki la pynpaw ba ka Meghalaya kam dei ka jylla ba don tang ki Khristan, hynrei kadei ka jylla kaba kiwei pat ki jait niam ruh ki don.
Kiba bun kiba la ïashim bynta ha ki ‘Social Media’ ki la shu ïaktaid tang ha kane ka jingleit bad ka jingbym leit jingïaseng. Hynrei kaei kaba ngi dei ban sngewthuh ba ka Sngi U Blei kadei kaba la buh kyrpang lypa na ka bynta baroh, ym dei eh tang na ka bynta upaid Khristan. Dei namar kane ka daw ba ha ri India hi baroh kawei, ka Sngi U Blei kadei ka sngi ba kiba bun ki ophis sorkar ki khang, nangta ki skul ruh ki khang bad wat ki dukan ruh bun ki khang ha ka Sngi U Blei.
Kumta ka Sngi U Blei kadei shisha ka sngi kaba kyrpang. Na ka bynta ki Khristan ka Sngi U Blei kam kut tang ha ka jingleit sha ki ïingmane ban shakri bad mane ïa U Blei. Hynrei kadei ka sngi jong ka jinghikai,ka jingsneng jingkraw naduh kiba dang khynnah, ki samla haduh kiba la heh ka san ruh. Lait noh na ka Sngi U Blei, kan long kaba eh ba ki hep khynnah, ki samla bad ki rangbah ruh kin ïoh ïa ki jinghikai kiba kordor, la ka long ha ka jinglong ba kynja mynsiem, ha ka akor ka burom, ka tip briew tip Blei, ka jingïeit ïa burom markylliang bad kiwei kiwei.
Nga ngeit skhem ba lada ki kmie ki kpa ki don arngut ki khun, khlem pep kin phah ïa ki khun jong ki sha ïingmane ban ïa kaba phah sha ki tamasa, namar kaba leit sha ïingmane ka kham kordor shibun ban ïa kaba leit sha ki tamasa.
Ka imlang sahlang mynta ka shah lynshop ha ka jingsniew kiba bun jait, khamtam eh ha ki jingdih kiba sniew kum u drok bad kiwei kiwei. Ka jingïoh lad ki hep khynnah,ki samla bad kiba la san sha ki jingmane, kan dei ka lad ïa ki ba kin ïoh jinghikai kiba kordor na ki jingsniew na ki jingdih kiba kum kine. Ngam ngeit ba ki awareness programme ki kham khlaiñ ka jinghikai halor ki jingdih ba sniew ban ïa ki jinghikai kiba ïoh na ki skul pynpaw.
Ka Sngi U Blei ka pynkynmaw ruh ym tang ïa ki Khristan, hynrei ïa baroh u paid shi tyllup ba kam dei ka sngi ba ki briew kin ïaleh sngewbha ban ïashad ïakmen ryngkat bad ki tamasa jong ka pyrthei, hynrei kadei ka sngi ba u khun bynriew un mane ïa la U Nongthaw.
La ju ïohi ba wat ka Seng Khasi ruh ka kheiñ kyntang ïa ka Sngi U Blei, ha kaba la ju ïakynduh ïa ki Khynnah, ki Samla, ki Longkmie, ki Rangbah kiba ju leit sha ki ïing Seng ban pynlong ka jingïaphylliew jingmut, ban sngap ïa ka sneng ka kraw bad kiwei kiwei de ki jinghikai kiba ïadei bad ka jingim tip briew tip Blei.
Namarkata ka daw ban knieh noh ne ban pynkheiñ noh ïa kane ka sngi kaba kyrpang bad kaba kyntang da ki tamasa ka long ka bym sngew ïahap satia, namar ym tharai ba ki Tamasa kin ai ïa ki jinghikai ne ki jingsneng jingkraw, hynrei kadei beit tang ka jingïaleh sngewbha ne ka jingpynbyrnia ne ka entertaintment.