Ka sngi u Blei ka sngi shuti ïa kiba bun, hynrei ki pulit ki hap mih surok ban talasi ïa ki ar shaka

Nongpoh, Rymphang 08: Watla ka sngi u Blei ka dei ka sngi shuti ïakiba bun ban pynlut por ban leit sha ki iingmane bad ban shongthaid hala ki jong ki iing ki sem, ki pulit ka Ri-Bhoi khlem shuti bad khlem shongthaid mynta ka sngi kila mih sha surok ban talasi naphang ïaki kali paidbah khamtam ki ar shaka ban pynthikna ba ka surok bah kan long kaba shngaiñ ïaki nongleit nongwan bad lait naki jingjia aksiden.
Bunsien ki jingjia aksiden ki ju jia dei namar ka jingkhlem-akor jong ki paidbah ki bym kheiñ snep haka por ba ñiah kali bad ki ar shaka khlem da burom ïaki kyndon bad ki aiñ ñiah kali khamtam ban phong helmet, ban kiar naka dih buaid bad khamtam ban deng ruh ïaki seat belt hynrei ïa kane ki leh tang haka por ba don ka jingtalasi hynrei ha kiba bun ki khep bad ba don ki jingjia aksiden, la lap ba bunsien hi ka dei ka jingbym kheiñ snep jong ki paidbah.
Lah ruh ban kdew hangne ba ka Ri-Bhoi District ka dei kawei naki district kaba jur bha ka jingjia aksiden khamtam ka jingdon ka surok 4-lane ka pynlong ïa bun ki kali ban pynher sted bad pynkheiñ ïaki kyndon aiñ bad ki don ruh ki kynhun kiba ju ñiah ar shaka ki pynlong ruh kum ka jaka lehkai ne jaka stunt kaba la pynthud ïa bun ki paidbah ba leit ba wan khamtam haka sngi u Blei, hynrei naduh ka jingshimkhia jong ki pulit khamtam ka jinghiar madan hi naduh u heh pulit ka Ri-Bhoi lem bad ki ophisar kala wanrah ka jinghiar arsut haki jingjia aksiden namar ki paidbah kila sdang ban phikir bad ban bud ryntih ïaki kyndon.
Kum ka jingbteng ban hikai ïaki paidbah ba kim dei ban kheiñ kai ïala ka jingim bad kumjuh ruh ka jingim jong kiwei, ki pulit ka Ri-Bhoi ha kylleng ki jaka ha shilynter u surok National Highway mynta ka sngi u Blei kila pynlong ka jingtalasi naphang ïaki kali paidbah khamtam ki ar shaka ban mana ba kim dei ban ñiah sted bad ban deng ïaki helmet bad ki seatbelt haka por ba ñiah kali ban lait na kano kano ka jingjia ba sngewsih.
Naka liang ki heh pulit ka Ri-Bhoi kila kyrpad sha ki paidbah ba ki dei ban kohnguh ïa kaei kaba la bthah ïaki ban leh khnang ba kan nym wanrah jingsyier ïakiwei pat ki paidbah ba leit ba wan ha shilynter u surok bah bad ban ñiah haka rukom kaba dei ban lait naki jingjia aksiden bad ki jingduh noh ki mynsiem ba lui lui.