Ka 5 tarik u ‘Nailur ne September ka dei ka sngi ba kyrpang na bynta ki Nonghikai. Ka jingkylli ka long balei ngi rakhe ïa kane ka sngi kum ka Sngi ki Nonghikai ne Teacher’s Day.
Ha shuwa ba ngin ïa phai shaphang ka Teacher’s Day, nyngkong eh ngi donkam ban sngewthuh kiei ki Nonghikai. La ju ong bad pynsngew na ka por sha ka por ba ki Nonghikai ki dei kita ki Nation Builders ne ki Nongtei ia ka Jingkiew Shaphrang ka Ri ha bun ki liang. Dei ma ki, kiba long kita ki nongpynsaphriang ïa ka jingshemphang ne jingnang jingtip lyngba ki jinghikai ha ki kamra klas ïa ki sobjek bapher bapher. Ban weng ïa ka jingsahdum sha ka jingshai ne to eliminate darkness into lightness. Lada ym dei lyngba jong ki, ka pule puthi ne education kan nym long kaba jop. Ka jingnang jingtip ba ki khynnah skul ki ïoh lyngba ki Nonghikai ka pynlong ïa ki ba kin long ki nongtrei kiba tbit ha ki kam bapher bapher, ki nongshong shnong ba don jingkitkhlieh ne responsible citizens bad noh synñiang ïa ka jingkiew ka ri ha ki liang bapher bapher.
U Dr. Sarvepalli Radhakrishnan u dei u Vice President ba nyngkong ka Ri uba kylla long ruh u President ba ar ka Ri ha ki, u la long u Nonghikai, uba long ruh u ‘riew shemphang ha ka thoh ka tar. Dei haba u la long kum u President ha u snem 1962 ba ki khynnah pule bad ki paralok jong u kiba ieit bad burom ïa u, ki kwah ban rakhe ïa ka sngikha jong u ha ka rukom rakhe kaba heh bad shongshit ne lavish celebration, namar ka jinglong jan jong u ïa ki khynnah pule, u la ong ia ki ban rakhe ia ka sngikha jong u ym tang na bynta ka jong u shimet, hynrei ban rakhe ïa ka sngikha jong u na bynta jong baroh ki Nonghikai kum ka jingñiewkor ïa u synñiang u bynhei ba ki la noh na bynta ka Ri bad dei ha ka 5 tarik u ‘Nailar u snem 1962 ba la rakhe nyngkong eh ha ka Ri India jong ngi kaba dei ka sngikha u Dr. Sarvepalli Radhakrishnan kum ka Sngi ki Nonghikai ne ka Teacher’s Day bad man ka snem la bteng ban kynmaw ïa ka bynta bakhraw ba ki Nonghikai ki la noh synñiang na bynta ban kyntiew ïa ka pule puthi ban pynmih ïa ki khun samla kiba pyntbit ha ki jingtreikam ba kin lah ban ïeng ha la ki kjat ha ki kam ba bun jait bad noh synñiang ïa ka Ri lyngba ki jingtreikam jong ki.
Kum ka jingñiewkor ïa u synñiang ki Nonghikai bad ka pule puthi ne Education ha ka jingkyntiew ïa ka jingnang jingtip ne knowledge kum shibynta ka jingïaid shaphrang ka Ri u la thoh ïa ka kot, “Political Thinkers of Modern India” kaba u la batai ba kumno ki Nonghikai ki don ïa ka bynta kaba khraw haduh katta katta khamtam haba ka Ri ka dang shu ïoh ioh ka jinglaitluid ha kito ki por.
Ka long kaba donkam ïa ngi lang baroh ban ai ka jingkyrshan ba radbah ïa ki Nonghikai ym tang ha kum kane ka sngi, hynrei ha shilynter lyngba ka jingïasnohktilang ha ka jingpynïar ne pynsaphriang ïa ka jingnang jingtip, da kaba ngi shimkhia lang ban peit ban jngoh ba ki khun jong ngi ki pyndep hok ïa ki jingbthah ki Nonghikai ha ki jingpule jong ngi, ban kohnguh bad burom ïa ki Nonghikai. Tang ki Nonghikai marwei kin nym lah ban pynlong ïa kine baroh hynrei ka kti kamon kti kadiang jong ngi iwei pa iwei naduh kiba rit haduh kiba heh kan ai mynsiem ïa ki bad long ka jingkyrshan ïa ki Nonghikai ban pyntyllun ïa ka jingshakri jong ki ïa ka imlang sahlang ban long kita ki knowledge delivery ne nongsam ïa ka jingnang jingtip.
Ki Nonghikai ki ïa kynduh bad mad shibun ki jingeh. Kyrmen da ka jingshimkhia lang baroh yn lah ban weng ïa ki jingeh jong ki, khnang ba kan ai mynsiem ba kin nanglah ban trei khambha shuh shuh. Ka jingïasnohktilang jong ngi baroh naduh ki khynnah skul, ki kmie ki kpa bad ki Nongialam kan pynurlong shisha ïa ka jingmut tynrai jong ka jingrakhe ia kane ka sngi katkum ka jingthrang u Dr. Sarvepalli Radhakrishnan.
Na ka liang ka sorkar man la u snem ka pynlong ka jingpynkupburom ïa katto katne napdeng ki Nonghikai ha ka kyrdan District Award ha ka District Level, State Award ha ka State Level bad National Award ha ka National Level kum ka jingñiewkor ïa kane ka jingnoh synñiang ki Nonghikai bad bteng ïa ka sienjam ba u Dr. Sarvepalli Radhakrishnan u la sdang bad ai jingmut.
Kyntang ïawai kane ka long ruh ka khubor ban ai khublei Teacher’s Day ïa baroh ki Nonghikai kiba ieit bad donburom ka Ri bad jylla jong ngi ha ka jingrakhe kaba 62 ha une u snem 2023 ha ka 5 tarik u ‘Nailur.
