Ka SNDRCSD kum ka kynhun ban peit ia ka jingshah pyniap pathar ki dohum dohwah

Mawkyrwat, Naiwieng 12 : Kum shibynta jong ka jingthmu ban tehlakam na ka jinghiar thma dusmon jong ki ‘riew shim kabu ban pynduh jait ïa ki dohum dohwah ne ki mrad ki mreng, na ka liang ki riewrangbah jong ka thaiñ Ranikor Block hynnin ka sngi Hatmajai ka 11 tarik u Naiwieng, 2025 ki la thaw ïa kawei ka kynhun kaba ki la jer kyrtang ka Synjuk ki Nongkhwai Dohkha jong ka Ranikor Civil Sub Division (SNDRCSD).
Da kaba thaw ïa kane ka ka Synjuk ki Nongkhwai Dohkha jong ka Ranikor Civil Sub Division (SNDRCSD) ki don ha ka ïa ka thong ban pynneh pynsah ïa ki dohkha, dohpat, ki mrad bad ki mreng kiba don ha ki wah bad ki umdohwah jong ka thaiñ Ranikor bad ym tang kata ka jingthmu ka long ban khanglad ïa ka jingpynïap pathar ïa ki jingthaw kiba im hapoh um bad ruh ïa ki mrad ki mreng kiba im ha ki lum bad ki khlaw.
Ka Synjuk ka la pynlong ïa ka jingïalang paidbah ban pynskhem ïa ki nongkitkam, kiba kynthup ïa u Bah H. Marweiñ na ka shnong Ranikor kum u President, u Bah P. Haster Sanglein na ka shnong Nongkdait Nongtwah kum u General Secretary, bad ki dkhot kumjuh arngut ki Adviser, kata u SDO Ranikor Civil Sub Division bad u BDO Ranikor Civil Sub Division. Ha kane ka sngi, ka Synjuk ka la pynskhem ruh ïa ki nongpeit pyrman kiba dei ban khmih ïa ki jaka kiba hap hapoh ka jingpeit jong ka.
Ka Synjuk ha kane ka sngi ka la pynbna paidbah ïa ki wah bad ki jaka kiba la hap ha ka jingmana, bad ka la khang pyrshah tyngeh ïa kino kino kiba pynïap pathar ïa ki doh um doh wah da ki rukom bapher bapher kum ka jingpynhap jar, ber dawai bih, siat bom, bret jar, sum dohkha bad tongtynsong.
Na ka liang sepngi ka jingmana ka kynthup naduh Wah Long-on, Wah Rilang, haduh Wah Kynshi bad Photksew sha Wah Kynshi, katba na ka liang mihngi ka kynthup naduh Wah Umngi haduh Umpung bad Balat. Ka Synjuk ka la mana ruh ïa ki wah rit kiba don ha baroh arliang, kum ka Wah Kynsaiñ, Wah Hlek, Wah Syadang bad Wah Mula.
Ka Synjuk ki Nongkhwai Dohkha jong ka Ranikor Civil Sub Division ka la maham tyngeh ba lada lap ïa kino kino kiba pynïap be-aiñ ïa ki doh um, doh wah ne ki mrad ki mreng, kin shah pynshitom katkum ka aiñ ba dei ban pyntreikam.