Nongpoh, Nohprah 12: Kum u nongmihkhmat ka Nongpoh Constituency sha ka iing Dorbar thawaiñ ka jylla, u Bah Mayral Born Syiem u la pynpaw ka jingsngewkmen kaba khraw ban ïohi ba ka skul Eklavya Model Residential School kaba la tei haka shnong Pahamsyiem kala sdang ban treikam bala wan ruh ban plie paidbah hynnin ka sngi da u Conrad Sangma Myntri Rangbah ka jylla.
Naka liang u Bah Mayral Born Syiem u la ong ba ka jingïaid lynti ban pynurlong ïa kane ka skul kala sdang naduh u snem 2019 ha kaba kum u nongmihkhmat u la trei shitom ban wad ki jaka ban pynieng ïa katei ka skul ba dei haka jingtreilang bad ka Dorbar Shnong Pahamsyiem lem bad ka Raid Nongpoh kila ai sngewbha ïa katei ka jaka ban pynieng ïa katei ka skul kumba ka long mynta.
U la ai ruh ka jingkhublei ba kyrpang ïa u Myntri Rangbah ka jylla u Conrad K Sangma, u Bah Lakmen Rymbui Myntri ka tnad pule puthi ka jylla halor jingurlong kane ka skul kaba kyrpang naka bynta ki riewlum kaba dei ruh ka skul EMRS ba nyngkong kaba la treikam bad plie paidbah haka jylla ka ban long ka jingkyrkhu bad ka jingmyntoi ïa kiba bun ki longiing ba duk ha Umling C&RD Block namar katei ka skul ka dei kaba ym donkam ban siew pisa.
