Shillong, Jylliew 24 : U Executive Member ka tnad Development jong ka KHADC, Bah Powell Sohkhlet ha ka sngi Ba-ar u la ong ba kadei ka sien kaba nyngkong eh ba ka Executive Committee jong ka Council kan wanrah da ka Recruitment Committee.
Haba kren bad ki lad pathai khubor, u ne u EM ryngkat ka jingdonlang u EM Finance, Bah Seibor Warbah, u la ïathuh ba kane ka Recruitment Committee kadei kaban peit ïa ka jingïaid beit ïaid ryntih ha ka thungkam thungjam ha KHADC.
Nalorkata, u Bah Powell u la ïathuh ruh ba ka Council nangne shakhmat kan ïohnong haduh 60lak tyngka ha ka shisnem tang na kaba print ïa ki trading license. Katkum ka jingïathuh jong u, kawei ka renewal trading license ka poi 1500 tyngka bad na kane 1300 tyngka ïoh uba shim wai bad ka KHADC pat kaba trei nadong shadong ïa ka kam ka ïoh tang 200 tyngka.
“Kumta lada ngi leh hi noh na ka Council, ka jingïoh lum khajna kan kiew bad kan poi kumba 60 lak tyngka ha ka shisnem,” u la ong.
Haba kren pat halor ka mangtyngka kaba ki wanrah ha kane ka sngi Ba-ar, u EM u la pynshai ba ka jingïoh ïa ka mangtyngka kaba ka jingmih ka tam ïa ka jingpynlut kadei namar kiba bun ki daw ba ka Executive Committe ka shim hadien ba ki la thaw ïa ka bor synshar ba thymmai ha KHADC.
U la ai nuksa ruh ba kawei kadei namar ba ka EC ba mynta ka la buh tang khyndiat ngut ki Executive Member, nangta kawei pat ba ki la weng lut ïa ki committee bapher bapher ba la thung da ki EC barim, kynthup naduh ki chairman ki secretary lait noh tang katto katne kiba dang i donkam.
Katba na ka liang u Executive Member ka tnad Finance haba bynrap lang u ong ba kane ka mangtyngka kadei kajuh kaba bteng ïa ka thong ban tyngkai bad ban ym leh lutphut.
Ha kajuh ka por haba pynshai pat halor ka jingong jong u Nongïalam ka Liang Pyrshah ha Iing Dorbar, Bah Titos W Chyne, u EM u la ong ba kam don satia ka rule kaba khang ïa ki.
