Shillong, Nailur, 14: U Myntri Rangbah barim ka jylla bah D.D Lapang u ba dei ruh u nongaibuit ka sorkar jylla mynta ka sngi ula ong ba ka jinglong jingman ka shong suk shongsaiñ hapoh ka jylla ka la kham bha mynta ka kynti haba ïanujor bad ki snem ba la leitnoh.
“Kam da don shuh ka jingshong syier lane ka jingshah pynthut ha ka shong suk shong shongsaiñ kumba ka jylla ka mad ha ki snem ba mynshwa, ha kaba ka jylla ka la sakhi ka jingshah pyniap ki briew, jingshah lute, jingshah rahbor. Baroh kine ki jingjia ki la sdang jah lut” la ong u myntri rangbah barim ka jylla u bah D.D Lapang haba jubab ïa ka jingkylli halor ka jinglah ka sorkar MDA 2.0 ba ïalam da ka NPP ban wanrah ka shong suk shongsaiñ.
Haba kylli halor ka jingïakajia ha ki thaiñ khappud, u bah DD Lapang ula ong ba ka jingpynbeit ïa u pud u sam ka dei lyngba ka jingïakren sngewthuh jingmut jong baroh artylli ki jylla bad ula kyntu ïa ki artylli ki sorkar jylla ban aiti met bad mynsiem ban wanrah noh ka jingpynbeit ïa la u pud u sam ka jylla Meghalaya bad Assam.
Hynrei haba kylli halor ka jinglah treikam ka sorkar MDA 2.0 ba ïalam da u myntri rangbah ka jylla u Conrad K. Sangma, u bah DD Lapang ula ai jingmut ïa ka sorkar ban sdang ïa ki kam naduh ki shnong ki thaw kum ka nuksa ban kyntiew ïa ka kam rep ka riang ha baroh kawei ka jylla.
U myntri rangbah barim ka jylla ula ïaroh ïa ka NPP kum ka sengsaiñ pyrthei ka ban rah ïa ki mat jong ka thaiñ shathei lammihngi (North East) bad ula ong ba namar ki mat ba ktah ïa ka bha ka miat ki paidbah bad ka thaiñ baroh kawei ka la pynlong ïa ki myntri sorkar pdeng ban kyntiew ïa ki thaiñ kyndong bad ki shnong.
