Ka shong ha ka party ban pynkylla ïa ka jingïoh bhah long Myntri Sorkar, ong u Bah Hek

Shillong, Nailur 15: U nongïalam ka BJP bad uba dei ruh u Myntri Sorkar u Bah AL Hek u la ong ba ka jingpynkylla ïa ka jinglong myntri ha ka sorkar ka shong ha ka rai jong ka party.
Une u MLA uba la jop la kumba 6 sien na Pynthorumkhrah constituency u la jubab ïa ka jingkylli ha kaba ïadei bad ka jinglah ban don ka jingïa bynta ha ka kam Myntri hapdeng jong u bad u Bah Sanbor Shullai, uba dei u MLA na South Shillong constituency, kumba ka la long ha ka sorkar MDA-1.
“Kumba long ha kaba ïadei bad ka kam ban pynkylla ne aiti ïa ka shuki myntri kadei ka kam jong u Myntri Rangbah ka jylla bad ïa kane ngam lah ban ong eiei,” ong u Bah Hek.
Na ka liang jong u, u la ong ba um lah ban ong eiei ha kaba ïadei bad ka jingaiti ïa ka kam Myntri kaba la ai sha ka seng BJP.
“Ngam lah ban ong eiei ngin ap ïa ka jingbthah jong ka party naba kane ka kam ka long da ka jingrai jong ka party,” ong u Bah Hek.
Ki tyllong khubor ba la ïohlum la ïathuh ba ka BJP ka la dep rai halor ka kam ïa bynta ïa ka kam myntri kaba long hapdeng ki arngut ki MLA ka BJP u Bah Alexander Laloo Hek bad u Bah Sanbor Shullai hadien ka elekshon MLA 2023.