Shillong, Iaiong 28 : Ka Shillong ka dei ka nongbah ba la wan ïuhkjat u Swami Vivekananda, u riewkhuid ba khraw tam jong ka India, ha ka por ba dang sdang ki spah snem ba 20. U la plié ïa ka Quinton Memorial Hall ha ka 27 tarik u Iaiong 1901 ha kajuh ka jaka ba ka Ramakrishna Mission Vivekananda Cultural Centre ka ïeng mynta bad u la ai jingkren ha kane ka jaka sha ki paidbah.
Kum shi bynta ka prokram ba lai sngi (27, 28, bad 30 tarik u Iaiong 2022) ban rakhe ïa ka jingdap 121 snem, la pynlong ïa ka prokram ba man u snem jong ki Computer Training bad
Languages Unit ha ar tylli ki bynta ha ka 27 tarik u Iaiong.
ïa ka bynta ba mynstep la sdang ha ka por 9:30 ha kaba la leit buh syntiew ha u mot jong u Swami Vivekananda da u Swami Sukhananda, Secretary, Ramakrishna Mission, Bhuj, Gujarat, bad Dr Nalin Mehta, Director, NEIGRIHMS bad Swami Hitakamananda, Secretary,
Ramakrishna Mission, Shillong. La bud da ka jingpyllait ïa ka kot “Ka Jingshai” – The Light Jyoti Volume: 3 Issue:1. La pynkup burom ruh ïa katto katne ngut kiba noh synniang sha kane ka kot kum u bah Sumar Sing Sawian, u Bikram Bir Thapa, kong Silbi Passah, bah Raphael Warjri, Dr Moushumi Dey, Dr Anita Panda, kong Bijoya Sawian, u Tanmoy Dasgupta, bad u bah Hammarsing L Kharhmar. Ka Ananya S Guha kaba long ka dkhot jong ka editorial board kam shym la lah ban ïadon bynta lang namar ka jingshitom.
Ka khusnam Vivekananda Award of Excellence
ïa ka khusnam Vivekananda Award of Excellence la ai sha u bah Robertson Thankhiew uba la
noh synniang bha sha ka Ramakrishna Mission Vivekananda Cultural Centre. Kane ka khusnam ka long lyngba ka jingthoh bad ka song tyngka kaba kot sha ka T. 15,000.
Ka bynta kaba mynstep
ïa ka prokram la sdang ha auditorium lyngba ka jingrwai ïa kawei ka jingrwai Khasi, ba la bud da ka jingai jingkren plié da u Swami Hitakamanandaji Maharaj, Secretary Ramakrishna Mission, Shillong ha kaba u la ai mynsiem ïa ki samla da kaba ong ba lada ka don kano kano ka bor kaba pynïasoh ïa ki jingim kiba ïapher bak- la- bak, kane ka dei ka jingïatylli hapdeng ki jingïapher.
Ha ka jingkren jong u, u Swami Sukhananda u la ai mynsiem ïa ki samla lyngba ki jingïathuh khana jong u shaphang ka jinglenlade na ka bynta ka ri. U la ong ba ka Bharat Mata ka kwah ïa ki briew ba kin len lade na ka bynta jong ka.
U kongsan jong kane ka bynta jong ka prokram, u Prof (Dr) Nalin Mehta, Director, NEIGRIHMS u la batai shaphang ki jingshem jong u ha kylleng ka pyrthei bad u la ong ba ka ‘jingieid ïa kiwei ka dei ka jingieid ïa u Blei’, kumba la ong teng da u Swami Vivekananda.
Ka bynta nohphai sngi
Ha ka bynta nohphai sngi kaba la sdang ha ka por 2:30, u kongsan, u Dr V K Mishra, Director, ICAR Shillong, u la batai shaphang ki jinghikai jong u Swami Vivekananda kiba ong ba ka
jingngeit ha ka hok ka long kaba kyntang bad kane kam pher lada u briew u bud ïa kano kano ka jingngeit.
U Br Amalachaitanya na Ramakrishna Math, Udbodhan, uba long u symbud kongsan jong kane ka bynta jong ka prokram u la kyntu ïa ki samla pule ba kin ïaleh ban kot sha ka jingjop kaba ki lah ban ïoh lyngba ka jingtrei shitom, ka jingpyrkhat ïa kiwei bad ka jingskhem jingmut.
Hadien kine ki bynta jong ka prokram, la don ka prokram kolshor ha kaba la pyni ïa ki rukom ki dustur jong ki briew ka India, khamtam ki jaitbynriew ka thaiñ shatei lammihngi. Kumba 1800 ngut ki samla pule ki la ïashim bynta ha kane ka prokram.
