Shillong, Naiwieng 04: U nongïalam ka Congress bad u MP ka Tura u Saleng A Sangma ha ka sngi Nyngkong u la ong ba ka party jong u ka la dei lypa ka nongjop namar na kane ka elekshon shiteng samoi ha Gambegre la lah ban tan shapoh naduh ïa u Myntri Rangbah bad ka kynhun myntri jong u bad ki MLA shaduh sha trai kjat ban kyrpad ïa ki nongshong shnong ka constituency ba kin ai ki vote da kaba ki la kren ruh ïa kiba bun ki kam bad ki mat jong ki.
Haba kren sha ki lad pathai khubor u Saleng u la ong, “Ngam pat ju ïohi ba u Myntri Rangbah ba un ïalap ha manla ki thliew ïing ha kino kino ki constituency wat hapoh ka constituency jong u hynrei mynta ki la kynthih sha ka thaiñ kaba kam dei satia ïa u, hynrei nga kmen bad sngewkmen ba u lah ban ïohi ba lyngba ka Gambegre kum kiei ki jaka kiba donkam ban kyntiew. Mynta namar ka tnga jong u, u la leit sha manla ki thliew ïing, ki basa bad ki shnong. Nga kmen ba kane ka elekshon shiteng samoi ka la tan ïa manla ki Myntri ka sorkar ba kin wan hiar sha madan ba kin ïohi ïa ki jingshisha kaba ki paidbah ki mad. Ka elekshon ha Gambegre ka la ai ka lad ïa ki ka jingsneng ïa kaei kaba ki la ïohi.”
Lah ban pynkynmaw ba u Saleng u la iehnoh kam kum u MLA ka Gambegre hadien ba u la shah jied kum u MP ka Tura.
Haba ong ba ka Congress ka la dep jop lypa ïa kane ka jingïakhun ha shwa ban long ka elekshon shiteng samoi na ka liang u MP u la ong, “Lada ngi jop ne ngi rem, nga tharai nga la jop ïa kane ka jingïakhun, ka Congress ka la dep jop lypa ïa kane ka election. Phi tip balei? Namar baroh ki Myntri sorkar, u Lamphang bad baroh ki MLA ki la leit sha ki kyndong kynshrot shapoh ka constituency barim jong nga ka Gambegre ha kaba ha kaba mynshwa kim ju phoh sniew ban leit sha kine ki jaka ne ba kim ju kwah hynrei mynta lyngba kane ka elekshon shiteng samoi ha Gambegre ka la tan ïa ki. Bad mynta phi tip ki la khrong na ka bynta ki vote. Peit mynta ka jinglong kongsan jong ki briew jong ka constituency.”
“Phi la ju ïohi ba u Lamphang, u Myntri Rangbah bad u Symbud Myntri Rangbah bad baroh ki la leit sha manla ki thliew ïing? Baroh ki MLA bad ki Myntri ki la leit shapoh ka constituency bad ban ïohi ïa ki jingeh bad ki la pyrshang ruh ban bishar ïa ki jingeh ba la mad da ki nongshong shnong. Peit ka bor jong ki briew,” u la bynrap.
Haba kynthoh ïa ka jingkynnoh ka NPP bad ka Congress bad ka BJP ki la ïatreilang, u Saleng u la ong, “Mano ba long ki beij ki ban ngeit ïa kane kawei? Naba dei ma ki kiba don ha kti ha kjat bad ka BJP ïa mynta, bad ha kane ka jylla ha kaba ki la ïadonlang hapoh ka sorkar.
U la kynnoh ruh ba ka NPP ka la pyndonkam da ka pisa bad pyndonkam bakla ïa ki kam jong ka sorkar haba ki pyrshang ban jop ha kane ka elekshon bad ong, “Ym tang ka pisa hynrei ki la pyndonkam ruh ïa ki tiar jong ka sorkar ha kane ka constituency kaba nga ieid ban ïohi namar ki briew mynta ki lah ban ïohi bad ban sngew ha kano ka por ba ki long kiba khlaiñ.”
Na ka liang jong u, u la kyntu ïa ka NPP ba ka dei ban kynnoh ïa la ki jong ki nongïalam ba khlem don ka roi ka san ha ka thaiñ Garo Hills haba jubab ïa ka jingkylli ba u la pulom ban wanrah ki kam pynroi hapoh ka constituency.
U Saleng u la kam ruh ba um ju leit khrong ïa ki vote namar ki nongshong shnong ki la vote ïa u halor ka nongrim jong ki report card kiba u ju sam manla ka snem. “Ha ki katto katne ki jaka, nga la ju pan mab lada ki don ki jaka kiba ngam lah ban poi kumta ngam ju khrong ïa ki vote. Nga ju kyrpad ïa ki ban peit ïa ki report card jong manla ka snem kaba kaei kaba nga la leh bad kaei kaba nga khlem la leh. Lada phim don ïa ka progress report, wat ym phai dien shuh. Nga la ai ha ki ïa ka progress report,” ong u Saleng.
Shuh shuh u la kynnoh ba ka NPP ka sngewdon ka jingma da ki briew ym da ka Congress. Haba ong ba ki briew kin sa rai ïa ka bok jong ki kyrtong, u Saleng u la ong, “Ngam don ban ong eiei hynrei dei ki paidbah ki ban rai. U Blei u la ai ha ngi ka mon kaba laitluid. Wat u Myntri Rangbah duh ka ri ruh um lah ban pynkylla ïa kane ka mon jong ki paidbah. Ngi la ïohi ïa u Myntri Rangbah duh ka ri ba u la ïalap elekshon ha Garo Hills hynrei ka BJP ka khlem jop wat tang shi seat ruh.”
Lah ban ong ba ka Congress ka la pynïeng da u Jingjang Marak kum u kyrtong jong ka khnang ba kan ïohbat biang ïa ka Gambegre seat. Un hap ban ïakhun pyrshah ïa ka tnga u Myntri Rangbah ka Dr Mehtab Chandee Sangma (NPP), arngut ki sitting MDC Sadhiarani M Sangma jong ka TMC bad Bernard N Marak jong ka BJP bad ïa arngut ki kyrtong shimet.
U Saleng u la ong ba u kyrtong ka Congress u dei u nongshong shnong jong ka Garo Hills. “U dei na Tura. U la long uba la khreh ym tang na Tura hynrei ha baroh kawei ka thaiñ Garo Hills,” u la bynrap.
